tadungan o waráy, nga kun iya buhaton nga sakripisyo
maiindultuhan hi iya tatay, kundi waray gud hiyá maruyag
bisan kun an iya kasingkasing naggiginuliat ha iya
pagpahanumdom han iya turumanon ha iya kag-anák. Ta,
yaná iya adto bubuhaton tungód kan Basilio, tungód han
mangarasawá ha iya? Amo na ngahaw in pagtinawai ha
iya, in pagbinadyangasi ha iya han bug-os nga kalibutan,
hi Basilio ngahaw makakayubít ha iya; diri, diri manta
hiya mapakadto! Siyahan magbibitay o maambak hiyá
ngadto hin usá nga umpas. Maraot na manta hiyá nga-
daan tungod han kawaray pulós nga anák.
An makaluluoy nga Julí nag-antos han ngatanán nga busá han iya mga kaurupdan nga, tungod kay waray kalibutan han nahananabó ha iya ngan hi P. Camorra, gintitiniawan hiya han iya mga kahadlok. Mag-aasá ba hi P. Camorra hin usá nga tagá hurón hin damo didá ha sawang? Ngan adto nga waray sarabutan nga kababayin'an nanhihinabi pa hin mga ngaran hin kadaragan'an nga mga salapian ngan maghusay nga nagkadidisgrasya. Ta, pananglit pagpusilón hi Basilio?
Hi Juli nananarop han talinga, naniniplat bisan ngaín pamilíng hin tingog nga maghihimangraw ha iya, nasiplat kan iya apóy; kundi hi iya apóy waráy tingog ngan nagkikinita la han iya bulós nga ipangaranop.
Hadto nga gab-i an tuman nga nahangaturóg. Mga inóp ngan hin mga ngarat, usahay kamiminatyan, usahay mga pamatay, namamagsaragyaw ha iya mga paniplat, nga masukot hiya hamangno nga iginpapamamalhas hivá hin mahagkutay. Bagá danay hiya makabati hin butó, bagá danay niya hikit'an hi iya tatay, hi iya tatay nga dako an binuhat tungod ha iya, nangangaway ha kagurangan, darakpon daw an mananap kay nag-aláng hiyá hin pagtubós ha iya. Ngan an dagway ni iva tatay nababalhin ngan iya kinikilala hi Basilio nga naghihingutás ngan nagkikinita ha iya hin paniplat nga kanán pag-uba. An waráy palad nga batan'on nabuhát, nangangadí, nagtatangís, nagtatawag kan iya nanay, han kamatayon, ngan namay dalikyat nga, kapoy na tungód han kahadlok, kun diri la gab-i nagdidinalagan hiyá ngadto ha kombento sahó kun anó in mahanabó.
Inmabót an sunód nga adlaw ngan an mga magbiduon nga panhunahuna, an kaharadlukan ha kasisidman
