upat na kabulan yana, han nag-aasoy hiya kan Basilio
han iya mga talinguha didto han kagurangan han iya
kaaapuyan, nabalik yana ha iya pamayhon sugad hin
mapulaag nga kakurulpon kahagos hin madalumdom
nga adlaw.
—Oo,— nagpadayon; —an palakat naghulos ngan ginbabyaanan han kadam’an tungod kay ako linmuya ngan naghialang dida han uras na nga labi nga ginpapamulat: may ada hadto nahawid ha akon kasingkasing, diri ako tag-iya han akon ngatanan mga pagbati ngan nahagugugma pa ako!... Yana an ngatanan dida ha akon nawagtang na, waray na marahalon nga minatay nga kanunay ko gin-iininop ngan gintatahod, waray na mga pag-aralngan; ikaw ngahaw, susgaranan nga batan’on, sarapati nga waray kapaitan, nga nasabot han kasuruk’an nga nadangop ha akon ngan nag-aaghat pagtulos! Baga dapit urhi na inin imo paghimangno! Kun nagkabulig kita, ikaw ngan ako, nahihimo ta in dagko nga mga buhat; ako ha igbaw, didto han kadagkuan, magpapasarang han kamatayon sakot han mga talamhot ngan bulawan, maglulurong han mga bisyuso ngan mag-aamong o mag-uulang han pipira nga magupay, ngan ikaw ha ubos, sakot han kinabuhi, ha butnga han mga luha ug dugo! An aton buhat diri unta nagiginmakangingirhat ngan makalilisang, nagmamapinairon unta, tuhay, mahusay, ngan waray ruhaduha nga ginpupulsan an aton mga kabudlay! Kundi waray gud ulo nga naruyag ha akon pagbulig; an kahadlok ngan kamaluya amo an akon iginkita didto han kamag-araman, pangibaiba didto han mga salapian, kawaray santop didto han mga batan’on, ngan didto la ha kabukiran, ha mga panhalinan, ngan didto ha pundok han mga kablasanon ako igkita hin akon mga tawo! Kundi waray sapayan! Kun diri kita makahitsura hin tima nga ladawan nga sangkap ngan mabamis, dida hiton bug-os pa nga tiripakon, say na la hito maghuhuman adin mga sumurunod!
Ngan kaptan dida ha butkon hi Basilio, nga nagpipinamati ha iya hin waray kasasayod hin tukod, ngan gindara ngadto han iya laboratoryo nga hinihipusan han iya mga productos quimicos
Ha bawbaw hin usa nga lamisa nakadto in usa nga kaha nga anit nga maitom, nga masugadsugad hiton surudlan hin mga bahilyas nga salapi, nga kabatasanan
