bitiis bagá sugad hin waray na han ginkikinahanglan
nga laksi, an iya mga tiíl nanhihibakinás didá han
bangketa bagá sugad hin namamaglakát ngan diri namamagkiwá,
an mga tawo nga iya iginhihisugat nakakauláng
han iya inaagian, ngan ugsa makapitád hin kanán karuhaán
kapitád nahagos anay in diri la limá kaminutos.
Han nakadto na hiyá ha antaw iginkabangga hiyá hin usá
nga batan'on nga nagtitinukdawon natindog an ulo, nagkikinita
ngadto han baláy. Kinilala ni Basilio hi Isagani.
-Nag-aanó ka dinhi?- ginpakianhan. -Taná! Hi Isagani naniplat hin waray tadong, hinmiyom hin masamdong ngan binmalik pagkinita han mga bukás nga balkon diín iya nakikita an madaparap nga mga lirik han nobya, nga nakapyot didá han nobyo, ngan nagtitiharayó.
-Taná, Isagani, paharayó kitá didá hini nga baláy, taná!-nagsiring hi Basilio hin garhob nga tingog kinaptan ha butkon.
Binulikwat hin mahinay ni Isagani an kamót ni Basilio ngan nagpadayon pagkinita han iya ginkikinita, amo la gihapon an masamdong nga hiyom an nakadá ha iya mga im-im!
-Tungod sa Dios, paharayó kita dinhi!
-Kay anó in pagpaharayó ko? Buwás diri na hiya amo.
May adá dako nga kasakit didto hadto nga mga pulong nga hi Basilio nahangalimót hin usa kadali han iya kahadlok.
-Karuyag ka mamatay?- nagpakianá.
Hi Isagani pinmakuró han sugbong ngan nagpa- dayon la pagkinita. Binalik pagkapti ni Basilio, pagdará.
-Isagani, Isagani, pamati, ayáw kitá pagkarag hin panahón! Ito nga baláy ginbutangán hin mina, magbubunggas diri maihá, uusa la nga sayóp, usa nga pagusyuso.... Isagani, ngatanán didá mamamatay upód hitón mga gubá!
-Upód hitón mga gubá? sinubád ni Isagani, sugad hin karuyag masayod, kundi ngadto gihapon an paniplat han bintana.
-Oo, upód hitón mga gubá, oo, Isagani! Por Dios, taná! Pag-aasuyan ta na la ikaw unina, taná la! Gin- butangán itó nga baláy hin maraot hin usa katawo nga
