katapos, an pangasoy han hinabó ngan han parasa nga
pangasoy ha katapusan. Ginpadamo an mga paaliday,
gintimod an mga salukniban nga pulong basi makagasoy
han paghipahuyáng ni S. E. ngan han urihi nga
kabunyagi ha iya hin tunluban didá han langitnon
niya nga agtang; gindayaw an kamasalihit pakabalik
ha tindog nga kabutang nga an ulo nakadto na ha igbaw,
nga amo an hinmumutangán han tiíl kanina, diri pa
la maiha; nagbahan hin awit sa Dios tungód han pagbawia
ha kataragman han sugad kabirilhon nga mga
tulan, ngan an sinurát naginmakaruruyag nga hi S. E.
nahataw sugad hin usá nga bayani, nga nadugang hin
kahilarom an paghibunlod, siring pa ni Victor Hugo.
Nagsinurat, nagpinamará, nagdinugang ngan nagriningbas
basi, hin diri gud mapaantaw ha kamatuuran-ngan
amo ini an iya kinalalain nga peryodista-gumawás
ngatanán nga makatarag-ob, dako para han pipitó, nga
kadiyusán, matalaw ngan bastos para han makawat nga
waray hikilal'i, “nga nag-unáy paghukóm ha iya ngahaw,
kay nabaraka ngan nagmatuod hadto ngahaw
han pagkadako han pagtalapas nga iya nabuhat! An
buhat ni P. Irene han pagsuksok ha sirong han lamisa
ginngaranan niya nga "usa nga pagtulos han pagkalalaki
nga waray kapara han pagsinirbe han Dios ha
kamingaw ug pagkabuutan nga hin-araan han bug-os
nga kinabuhi"; hi P. Irene karuyag kuramhagán an
kriminal ngan basi hiabután pinmili han diri maliko nga
dalan salit sinmuhot han lamisa. Nagpahimulos paghinabi
hin mga dalan ha ilaróm han dagat, pati iginsaysay
in usá nga proyekto ni don Custodio, hinnumdumán
an kamaaram han padi nga han iya pagbirubiyahe
ha kahigrayuan. An kaunop ni P. Salvi amo an
diri matupngan nga kasakit nga dinmangóp han darayawon
nga pransiskano nga naabat han gutiay nga bunga
nga ginpupulsan han mga indiyo didá han diniyusnon
niya nga mga wali; an diri pagpakakiwá ngan panhirag-i
han ibá nga manarangka, usa ha ira amo an condesa nga
"nagsagubay" (kinmapyot) kan P. Salvi, iya ibinutáng
nga diri kataranta ug kawaray kaalantad hin mga
bayani nga hiara na han kataragman didá han pagtuman
han ira mga katungdanan, nga kun igtanding ha
ira an mga senadores romanos, han pagsulunga han mga
galos, bagá la in mga suruksurukón nga kababayin'an
nga pinanngangalasan hin pinintar la nga mga bangka.
