kulo ngan ugsa magpawa iya iginpadará ngadto ha panuratan
upód na an pagtugot han magsuruson. Ngan
kinmaturog sama kan Napoleon katima pag-andam han
paagi kun uunanhon an pagpalakát han batalya ha
Jena.
Ginsangpit han pagkaaga kay an iya sinurát iginpaulí upód in surát han sumaritanan nga hi S. E. kunó nagdirí, hin madig-on ngan waráy baribad, nga paghiruhimangrawon adto nga hinabó ngan nagtugon nga panginbuwaon an bisan ano nga karukayakan ug mga paghinabi nga maglakát, sidngon la nga ito ngatanán puro susumaton, pahurabturab ngan pabuwabuwa.
Para kan Ben Zayb pagpatay adto hin usa nga anák nga mahusay ngan maupay nga lalaki, nga natawo ngan ginpatubo hin dako nga kasakit ug kagul'anan, ta, yaná, diin man mahapipil-ot adto nga madasig nga hurab, adto nga pagparakadaká pagpakita hin pagkaandam ha pakisuhay bahin ha pagkamatadong? Ngan maupay man ngani kun diri hiyá, ha sakób hin mga usá o duhá kabulan, magikán na dinhi ha Pilipinas ngan an artikulo diri mahagagamit didto ha España, kay uunanhon in pakagyinakan mo hadto nga mga pulong kontra han mga kriminal didto ha Madrid kay lain man didto an mga panhunahuna, didto ginbibiling anay in mga makairiban han sirot, gintitirutimbang an mga buhat, may mga jurados ug ibá ibá pa? An mga artikulo sugad hinin iya, masusugad han mga agwardyente nga hiniluan nga hinimo ha Europa, maupay nga paraliton han mga negro, good for negroes, an ginkakalainan asya nga kun diri inmon han mga negro diri nakakamatay, hamtang an mga artikulo ni Ben Zayb, basahon diri han mga pilipino inaabat an lara.
-Maupay na la kun hananabó in pagtalapas buwás o isangbuwás!-- nganiya.
Ngan didá hinín panhunahuna hinín anák nga namatáy waray pa katatawo, daw biyuos nga tinakig han hagkot han yelo, ngan han pag-abat nga naghuhulós an iya mga matá, nagliwán ngan mapakadto han sumaritanan. An sumaritanan nagpakuró la han sugbong: igindiri ni S. E. kay kun mahasangyaw nga in pipito nga dagko nga diyós nga nagpapakakapót hin mga tenedor ug mga kutsilyo pinanhirag'an ngan napa- pagtikas hin usa nga bisan la hino, namimiligro an Natawhan nga Tuna! Salit nagsugo nga diri pagludpon an
