hin mga asó. Sugad han kinikita didá han asó ngan han
kahalaghag han butó, an diri kinikita nga mga kaaway
tutuló la an pusíl. An mga sibíl nagtitidaóp hamtang
nagpipinabuto, napapanalipód ha luyó hin mga batang
nagtatalbo an tuna. An siyahan nga sibíl nga nangahás
pagsaká napuklid ngan nagtambulilid kay naigó ha
sugbong.
An diri kinikita nga kaaway nakakalupig tungód han ira hinmumutangán; an mag-isog nga mga silbíl nga diri maaram dumalagan, nag-iisol na kunta kay nanhihipaukóy, diri na buót mag-apras. Adto nga pangaway kontra han diri kinikita nakakahadlok. Waray nira kinikita kun diri asó ngan mga bató: waray tingog hin tawo, bisan lambong: haros pakasidngon nga an ira kaaway amo an bukid.
-Halá, Carolino! Hain na an imo kamaigo, p----! --ginmuliat an kabo.
Hadto ngahaw binmutho in usa katawo ha bawbaw han bató ngan magbarabád han pusíl. -Pusilá itó! ginmuliat an kabo binmuyayaw hin malaw-ay.
Tuló nga sundalo an sinmugót, kundi an tawo waray kaanó didá han tinutukdawán; dako an tingog kundi diri hinsasabután.
An Carolino nahapaukóy, bagá may kinikilal'an niya didto han mga lirik nga sinisirakan han adlaw. Kundi gintarhog hiyá han kabo nga papaysukán han bayoneta kun diri magpabutó han pusil. An Carolino hinmimunta ngan binati in butó. An tawo didá ha bawbaw han bató tinmambarik ngan nawará lakip in guliat nga nakalisang han Carolino.
Usa nga kiwá inabat didto han karupdupan bagá sugad hin an nakadto didto nagpapanago nagsisibrag magkalainlain an tadong. An mga sundalo nagtikáng pag-atraka kay waray na naato. May usá líwát katawo nga tinmungtong didá han bató may bitbit nga sugób; an mga sundalo nagpabutó ngan an tawo naghinayhinay pagdukó, kinmapyot ha usa nga sangá; usa pa nga butó ngan nahapahuyáng didá ha bawbaw han bató.
An mga sundalo nagkasagka hin dagmit, namagtal- ob hin bayoneta, andam ha pakiaway hin minanók; an Carolino amo la an naglalakát hin bagá nahuhubya, an paniplat waray unob nga turon, burigó, nagdidinumdom
