"Hinigugma ko nga Kapelyan: Kinarawat ko tikang ha komandante in usa nga telegrama nga nasiring: ‘Español escondido casa padre Florentino cojera remitira vivo muerto. Tungod kay iní nga telegrama mahayag kaupay sumati iton aton sangkay nga diri didá maghulát kun makathon ako pagdakóp ha iya niyan nga gab-i ha mga ika-waló an takna.
- Imo mahinalangpon
- Perez
- Imo mahinalangpon
Sunuga ini nga surát.
-I...i...ni nga Victorina, iní nga Victorina!-nagngualnguál hi don Tiburcio;-ma...ma...magahóm pagpapusil ha akon.
Waráy gud kahawiri ni P. Florentino: kawang la an pagsiniring niya nga cojera karuyag sidngon dakpon; nga an katsila nga natago diri amo hi don Tiburcio kundi hi Simoun an alahero, nga may duduhá pa la kaadlaw tikang naabót, samád ngan kalagiw, ngan nangaro nga pasak'on. Hi don Tiburcio waráy tumuod; cojera amo an iya kapiulán, an iya mga tigaman ha lawas; buhat adto ni Victorina nga karuyag gud nga hidakpan hiya, mamatay, mabuhi, sugad han surát tikang ha Manila ni Isagani. Salit an makaluluoy nga Ulises linmakát didto han baláy han padi ngan lumuók didto han payág hin usa nga parapangahóy.
Waray ruhaduha ni P. Florentino nga an katsila nga ginbibiling amo an alahero, hi Simoun. Inmabót hin paurusahon ngadá ha iya baláy hiyá ngahaw an nag-uusong han iya maleta, nagkakadugó, masubó ngan kapoy hin duro. Tungód han kinaiya ngan hukas ha kasingkasing nga pag-amuma han mga pilipino, kinarawat han klerigo hin waray mga pakiana, ngan tungód kay an mga hinabó ha Manila waray pa aabót ha iya mga talinga, waray gud man hiyá kasasayod hadto nga kamutangan. An nahihimo la niya nga banabana nga tungod kay ginmikán na an General, sangkay ngan sinasarigan han alahero, tingali an mga kaaway hiní, an mga rinaugdaog, an nagkapipiruhisyo, inmalsa yaná ngan namamagdumót, ngan an nalingkod anay yaná nga General nagsugo pagpadakóp basi pagbawian han mga manggad nga iya natirok. Salit kinmalagíw! Kundi itón iya mga kasamdan tungód man hin anó? Nag-ipag-urunay? Lara han mga pagdumót? Kun agi la hin kakulang hin pagtagám, sugad han sumat ni
