wasan nga kun say mawaray kawang la an pagkamatadong!
—Kay ano man nga waray ako niya buligi?—nagpakiana an tingog han masakit nga tugob hin mapait nga sumbong.
—Tungod kay say mo pinili an paagi nga diri Niya mauuyunan!—binmaton an padi hin tuptop nga tingog: —an himaya ha pagtubos hin usa nga tuna diri masasangpot hadton nakaamot pagludlod ha iya! Ikaw nakasiring nga an gindum-itan ngan ginpiulan han pagtalapas ug panhimaraot mapupurog ngan matutubos hin lain nga pagtalapas ug panhimaraot! Sayop! An kasina waray nahihimo kundi mga dagway nga magraot; an pagtalapas, magtinalapasnon; an gugma la in nakakahimo hin mga buhat nga magpakaruruyag, an kadarayawon amo la an nakakatubos! Diri; kun an aton tuna maglulugaring mga sano, diri tungod han kasurusnan ug pagtalapas, diri aada ha pagtubyan ha karat’an han iya mga anak, paglimbong hin pira ha ira, pagpalit han iba, diri; an pagkatubos may dara nga kadarayawan, an kadarayawan, pag-ula, ngan an pag-ula, higugma!
—Maupay! tatangduan ko iton imo pangasoy,—binmaton an masakit katapos hin madali nga pahuway; nagsayop ako; kundi, kay ano nga nagsayop ako? Ngayan ito nga Dios nadiri paghatag hin katalwasan hin usa nga bungto, ngan babawion ha karat’an an iba nga labi pa ka-mga tampalasan ha akon? Ano an kadako han akon sayop kun itanding han pagtalapas han mga punuan? Kay ano nga ito nga Dios say lugod ginkikita an akon pagkamaraot diri an mga araba han kadam’an nga mga waray sala? Kay ano nga waray ako patuki ngan unina pinadaog an bungto? Kay ano nga pinabay’an nga magantos an mga takos ug mga magtinumanon ngan maginukoy ha kalipay hamtang nagkikita han mga darahog?
—An mga magtinumanon ug mga dungganan angay mag-antos basi an ira mga panhunahuna hikilal’an ngan maglurab! Kinahanglan uy-ugon o buungon an mga garrapa basi maipis an ira kamot, kinahanglan tiktikan an ba to basi magkalayo! Dapit may ada larang han Magburuot dida han mga panraugdaog han mga manlulupig, senyor Simoun!
—Maaram ako,—nagmugo an masakit,—salit gin-aghat ko an mga panamastamas....
