makaruruyag, an harupoy mahalayahay, an mga bituon
ha sidlangan namamag-arupaóp ngan an mga manók
nagduduro hin panugaok. Duro na adto nga pag-ungara;
masarusayón han Virgen an pagpadará hin duhá
kagatós kalim'an kapisos! Ano in kuri ha iya, han Iroy
sa Dios, hin paghatag hito ha iya? Kundi didá
ha ilaróm han ladawan say la niya hin-abatán an surát
ni iya tatay nga naaro hin lilima kagatós kapisos nga
lukát ha iya... Waray iba nga mabubuhat kundi an
paglakát. Han pag-abat nga hi iya apóy waray pagkikiwá,
pinakasiríng nga nakaturog naglaso hin luya nga
pamahawón. Urusahon! Waray la hiya kukulbaá, tinatawatawa
pa ngani lugód. Ano daw la nga hadto nga
gab-i nagmabiduon man hiya nga uraura? Diri man
hiya mapakadto ha hirayo, makakalaoy hiya ha ira
balay kinaduhá kaadlaw; hi iya apóy makakahimo hin
pakigkita ha iya, ngan an mahatungód kan Basilio, maiha
na ini nga maaram han maraot nga lakát han kalipungan
ni iya itáy kay masukot magyakan ha iya hin
pagkasiring:
-Magmediko ngani ako ngan magkaasawa kita, waray na kinahanglan ni imo tatay hitón iya mga tuna.
-Kalurong ko nga nagtinangis ako hin sugad hadto, nakasiríng hiya hamtang naghihingayad han iya takba.
Ngan tungod kay an iya mga tudlo nakasaping han relikaryo, iya ini idinuok ha iya mga im-im, hinadkan, kundi pinahid niya dayon kay nahadlok han tapón; adto nga relikaryo nga may mga brilyante ngan esmeralda tikang adto ha mga kamót hin usa nga sanlahón... Ah! amo daw ngahaw, kun tapunán hiya hadto nga sakit, diri hiya makakaasawá.
Ngan tungód kay nagtitikáng na pagpawa ngan nakakitá kan iya apóy nga nalingkod didto hin usa nga piliw, nag-iinarualagad an paniplat han iya ngatanán mga kiwá, pinurot niya an iya takba nga puno hin panapton, dinmaop hin mahiyumhiyom ngan humarók han kamót. Binindisyunan hiya han tigurang hin waray yakanyakan. Hi Juli naruyag pag-intrimís.
-Umuli ngani hi itáy sidnga nga tinmuód ako pagsulód ha kolehiyo: iton akon agaron maaram mag- kinatsilá. Diri na igkikita hin sugad kabarato nga kolehiyo.
