mga kulod nga esmalte, may mga katingalahan nga badlis nga arabesko nga mga urusahon.
Inalsa ni Simoun an kasón ngan kinita in sugad liwát nga burutangan nga punó hin mga katingalahan nga hiyás nga sadáng makapagpatakas han mga kaipahán hin pitó nga daraga ha pitó nga sarayaw nga ighatag ha pagpasidungóg ha ira. Mga urusahon nga kahimo, mga pagkaparapdis han mga bató ngan mga perlas nga nanhihitsura hin mga mananapay nga bughaw an lawas ngan magsilhag an mga pako; an sapiro, an esmeralda, an rubi, an turkesa, an brilyante nagkakatarampo ha paghitsura hin mga tambuburay, mga alibang bang, mga lapinig, mga putyukan, mga bagang, mga halas, mga tiki, mga isda, mga bukád, mga hinugpong ug ibá pa; may mga sudlayay nga dagway hin diyadema, mga bitáy ha liog, mga balióg nga perlas ngan brilyante nga magpakaururuyag, nga may kadaragnan'an nga waray pagpakailob hin pagsiring "agidaw!" bahín ha paghitingala, ngan hi Sinang nakatakla salit kinulitog ni iya mamá, hi Kapitana Tiká, kay nahadlok nga tungód hito pagmahalón han alahero an mga alahas. Hi Kapitana Tiká makutol la gihapon han iya anák bisan kun inasaw'an na.
-Iiní, makita ka na ngahaw hin mga brilyante nga kadaan, nagsiring an alahero; -iton ütó nga singsing nakanán Princesa de Lamball itó, ngan iton iito nga mga ariyos kanán usa ito nga dama ni Maria Antonieta.
Magpakaruruyag nga mga solitaryo nga brilyante nga tigsugad hin lugás hin maís kadagko, magbughaw an silaw, may pagkamananong nga garbo daw nabilin pa an mga kahadlok hadton panahon nga Makalilisang.
-Iton ito nga duduhá nga bitáy! nagsiring hi Sinang nagkikinita kan iya papá ngan layón itinabon an iya kamót ha butkon nga harani kan iya mamá.
-Karuyag ko in mga darudaán pa hiní, an didto ha Roma, binmatón hi Kapitan Basilio nagkikiniro. An makidiyos nga Hermana Penchang naghunahuna nga kun say adto niya maharegalo, an Virgen ha Antipolo mahumok ngan itutugot ha iya an iya dako nga ungara: maiha na nga panahon nga iya gin-iinaruan hin usa nga milagro nga makakaaringasa ngan mahaaapi an iya ngaran basi madayon nga buhi dinhi ha tuna ngan
