kikita kan inay!— nakimaluoy hi Basilio, kinaptan an iya manghod kay tuyo niya in panabag. Dinagpas an iya kamot han sakristan mayor ngan butungon hi Crispin nga nagtikang hin pagtinuok nga linmupog ha salog, napapagdanas la, ngan sumiring han magurang: —Ayaw ako bayai, papatayon ako! Kundi gindanas han sakristan mayor, tipaubos dido, han hagdan waray pagtagad han iya kurahab, tubtob han katago nira didto han kasisidman. Hi Basilio waray pakatingog bisan mausa kapulong. Hinbabatian niya an hinulantog han iya manghod dida han mga balitang, hinbabatian niya in kuligi, mga linapiki, ngan unina nagtikawara adto nga mga tingog nga magpakababaraka. An bata waray giginhawa; nagpipinamati, nahapapatukdaw, nabuburarat an mga mata ngan nakumo han mga kamaoo. —Sano daw la ako pakakag-arado hin tuna! — namulong hiya, nagliligot, ngan lumusad hin dagmit. Han pag-abot ha kudo mamati anay hin tiid: an tingog han iya manghod malaksi an pagtihirayo ngan an guliat nga “nanayl, mano!” napapas hin tibway han paghagaklob hin usa nga sada. Nangungurog, iginpapamamalhas, hinmunong hiya nadaliay; kinmagat ha iya kamaoo pagpugong han iguruliat nga nagbubuto ha iya kasingkasing ngan magpaniplaton didto ha sakob han singbahan nga an tuman la nga linawagan. May ada didto dagkot nga lamparahan hin lana nga an tuman la nga nagdidingga; an tumba nakada ha butnga; sinadhan ngatanan an mga agian ngan an mga hangawan may mga rihas. Dinmalidali pagsaka han haruhagdanay, inagian niya an igbaw nga dinagkutan hin upos nga kandila, ngan sumaka pa ngadto han ikatulo. Pinanhubad niya an mga pisi nga nanhihitaod didto han mga matubuto katima lumusad liwat, iginduduruas, kundi nagdidingga an iya mga mata ngan diri tungod hin luha. Igo man nga an uran nagtitikang pagtukal ngan an langit nagtitikapawa hin hinayhinay. Ginsurusumpay ni Basilio an mga pisi, ihinigot niya in usa nga katapusan dida han tukdog han rihas ngan magharushos tipaubos, ha butnga han kasisidman, waray na hinumdom pagparong han suga.
