kun napulo ba adto kag-usa han nanlalambrag na an mga bituon didto ha langit nga ginbubuniasan han unos, nalingkod hi Sisa didto bin usa nga bangko nga kahoy ngan nagkikinita han pipira nga tiak nga an tuman la nga naglalaga didto han iya gid-angan nga tinungkuan hin mga bato nga tinipaktipak. Dida han usa nga sug-ang may sinun-ad nga kanon ha tiko ngan didto han mga baga may sinugba nga tutulo nga bulad nga tamban nga tigtuluon an usa nga dako.(7) Nanininangko hi Sisa, nagkikinita han madarag ug maluya nga laga han kawayan nga kun nababaga na diri la liwat nakakapira maagbon; may uusa nga masurub’on nga hiyom nga inaabat dida han iya nawong. Nahanumdom hiya han usa nga tigutigo han daba ngan han kalayo nga ipinatigo ha iya ni Crispin nakausa. Nasiring: Nagaang hi Itom gindukdok hi Pula. Waray daw pag-iha magpangalakaga(8).
Batan’on pa hiya ngan inaabat nga hadto anay mahusay ngan angayan. An mga mata nga, sugad han iya kalag, ihinahatag niya han iya mga anak, magpakaruruyag, haglaba an mga pirok ngan masinantupon isiplat; an iya irong waray suson; an mga labsagon nga im-im mag-upay an katabas. . .aysa hiya an sinisiring han mga tag-alog nga kayumangging kaligatan, karuyag sidngon nga maitum-itom kundi uray ngan waray dum-it. Kundi, bisan hiya bata pa, an mga kasakit, o tingali man an mga gutom, nagtitikang na pagpaludyak han iya duason nga bayhon; an marabong nga buhok nga hadto anay sabong ug rayandayan han iya lawas, kun yana hinkikit’an nga pinungos, diri tungod hin paglabyaw kundi tungod kay naginbatasan; usa nga kapungos nga yano la, waray mga tugsok ug mga sudlay. May ada na mga pipira kaadlaw nga waray hiya lulusad kay naghihinuman hin usa nga tinahi nga itinapod ha iya ug igintugon nga dalion. Basi la makakarawat hin suhol, waray hiya singba hadto nga adlaw kay naulang hiya hin kanan duha kauras tikadto ha bungto ngan tipabalik liwat: an kablasanon napipirit hin pakasala 1 Han pakahuman niya han buruhaton dad’on niya ngadto han tagada, kundi ginsaaran la liwat hiya nga babaydan. Han bug-os nga adlaw waray niya iba nga ginpipinanumdom kundi an mga kalipayan ha gab-i; nahabaro nga mangunguli an iya mga anak, salit naghunahuna hin isu-
