patay an akon anak! Inin mga guwardya sibil diri namamaghunahuna han mga iroy!
—Siring la nga nahulog ako ha kahoy; waray gud angay mahabaro bisan liino nga girilanat ako.
—Kay ano in paghibilin ni Crispin?— nagpakiana hi Sisa katima niya pagtambal han iya anak.
Ginkinita ni Basilio bin madaliay an iya iroy, katima iya hangkupan ngan pagsumatan hin hinayhinay han nahanabo mahatungod han onsita; kundi waray niya pagsumati han mga darahog nga gin-antos han iya manghod. Ginsakot han iroy ngan han anak an ira ngaduha mga luha.
-—An inugayan ko nga Crispin! Ginpasiparahan hin pagtahapi an inugayan ko nga Crispin! Tungod kay mga kablas kita, an mga kablas kinahanglan nga mag-antos han ngatanan!— Pulong ni Sisa nga naglilinuha, naatubang han lamparahan(2) nga hinuhubsan na han lana. Nanhipaukoy hira hin pira kadali, waray yakanyakan.
—Inmiklop ka na? waray pa? May kanon ngan hin bulad nga tamban.
—Diri ako ginugutom; tubig, tagi la ako hin tubig.
—Oo! — nahakaluoy an iroy; —maaram ako nga diri ka naayon han bulad nga tamban. May ada ko gad iginandam ha imo nga lain, kundi sinmaka hi imo tatay . . .
Kairo han anak ko!
—Sinmaka hi tatay?— nagpakiana hi Basilio ngan say dagos panginanuon an nawong ug an kamot ni iya inay.
An pakiana han anak naggumos han kasingkasing ni Sisa nga sinmabot hin uraura salit dinmalidali pagsiring:
—Sinmaka ngan nagpinakiana mahatungod ha iyo, karuyag ha iyo kumita; ginugutom hin duro. Nagsiring nga kun magpadayon kamo hin kamaupay mabalik hiya hin pakiglungon ha aton.
—Ngayan!— nagmugo hi Basilio ngan yumam-id.
—Intoy !—sinaway ni Sisa.
—Ayaw ako kabidui, inay!— nagsiring hin ungudungod; —Diri ba maupay nga makita na la nga tulo, hi ikaw, hi Crispin ngan hi ako? Kundi nagtatangis ka, waray ko ginyakan nga bisan ano.
Hi Sisa nanhayhay.
—Diri ka maiklop? Ta, kun asya, pangaturog kita kay tabis na.
Sinadhan ni Sisa an payag ngan an gutiay pa nga
