la niya maupay. An kapiraw nagtibalik liwat hin hinayhinay ngada han guol nga mga mata han bata ngan dida hini an Ole Lukoie nga isinusumat ni Andersen binmuklad han iya makaruruyag nga payong nga may magpakawiwili nga pintar! Nakikita niya nga paramangno na hiya hin hayop, hiya ngan han iya manghod; nga nangunguha hira hin mayabas, alpay ngan hin iba pa nga mga bunga dida han kakahuyan; nga nag-aarualapon hira dida han mga sanga maglaksi sugad hin mga alibangbang; nanunulod hira ngadto han lungib ug nakikita nira nga didto ha sakob maranggat; nangangarigo hira didto han mga burabod ngan nakikita nira nga an baras bulawan ngan an mga bato sugad han mga bato han korona han Virgen. Ginkakantahan hira ug ginkakatatawaan han mga iruisdaay, yinuyukbuan hira han mga sanga han kahoy nga naduyok kay gin-uurapungan hin salapi ngan hin mga bunga. Katima, nakita niya in usa nga lingganay nga nabibitay dida hin usa nga kahoy ngan may nabitatay nga pisi nga karaptan pagbagting: ha katapusan han pisi nahihigtan in usa nga baka ngan ginsasalagan hin tamsi ha butnga han mga sungay, ngan hi Crispin nakadto ha sakob han lingganay, ug iba pa. Asya ini an iya gin-iininop. Kundi an iroy nga diri na kanan bata an panuigon ngan waray hadto nga gab-i pagdinalagan ha sulod hin usa kauras, waray hingangaturog.
XVIII. TINIKANGAN HIN BURUKA— CASUS BELLI (1)
May mga ikapito ha aga nga 'hi Fr. Salvi makahuman han urhi nga misa; han tulo nga misa nga iya iginhalad ha sakob hin usa kauras. —Masakit an padi, — nasiring an mga magpakidiyos: —diri sugad hin kamahinayon ngan kamakaruruyag pagkit’on han kabatasanan. Naglubas han iya mga sul-ot hin waray yakanyakan, waray sirusiplat bisan kanay, waray mugomugo nga bisan la ano. —Tagam kamo yana! — may hinhuringhuring han mga tanod; —an barreno nagtitikang! Waray pada unina
