ko hiton akon baradlisan. Diri ako buot maglimbong ngari diri ako buot paglimbungan ako. —Inuunano mo man? — nagpakiana hi Juana. —Angay mo pagsubdan I Sugad hini: pananglitan makakarawat ko in usa katuig nga indulhensya, ibinabadlis ko ha akon kwaderno ngan nasiring ako: “Baraan nga Amay, Senyor Santo Domingo, pag-alayon kita panginano didto ha Purgatoryo kun may ada ba nagkikinahanglan hin igo la nga usa katuig, diri lumabis, diri kumulang.” Pinakukunong ko in kuwarta: kun bayhon, diri; kun korona, oo. Ta, pananglitan korona, nasurat ako: “kobrado”; pananglit bayhon? Diri ko ginlalabtan an indulhensya, ngan akon gintatarampo hin tinaggatos katuig nga linainlain ko pagbadlis. Kanugon nga diri ta nahapapagpalakat sugad han salapi nga ginpapatubuan; darudamo unta nga kalag in mababawi. Tuod la, sugara hito. —A, ako, mauruupay hito iton akon paagi 1 — binmaton hi Hermana Sipa. —Ano? mauruupay?— nahapahungat hi Rufa. —Diri mahihimo 1 waray na masugad hiton akon. —Pamati mausa kadali basi ka sumabot, hermana!— nagpadayon an tigurang nga Sipa nga dapit nabigit. —Hala daw, hala daw! pamatii ta! — nagsarabat an
iba. Katima igham, namulong an lagas sugad hini: —Maaram kamo kaupay nga kun pangadion an Bendita-sea-tu-Pureza ngan han Senor-mio-Jesucristo-Padre-dulcisimo-por-el-gozo, makakarawat in nanapulo katuig ha tagsa nga kurit . . . —Kakaruhaan! —Diri gad man! —Lilima. Nagsarabat in mga pira nga tingog. —Usa nga labis, kun usa man nga kulang waray sapayan! Yana: kun usa ko nga suruguon babayi o lalaki nakakabuong hin pinggan, baso o tasa ug ano pa, pinapapamurot ko ngatanan nga mga tipik ngan pinapapangadian ko an tag-usa nga tipik, bisan an gigudtiayi, han Bendita-sea-tu-Pureza ngan han Senor-mio-Jesucristo-Padre-dulcisimo-por-el-gozo, ngan an mga indulhensyas nga akon nakakarawat iginpapahanungod ko han mga kalag. Didto ha balay an diri la maaram mangadi an kamisayan.
