Ini nga bata maupay magyakan! Diri parayawnon! Maupay magpahamutang han mga pulong! May hinsiring han tagsatagsa.
—Kanugon na nga diri maaram magdara hiton kamot! —nagmugo hi Kapitan Basilio. —Salit kay waray pagaram kan Ciceron!, ngan bata pa.
—Kun igpahayag ko ha iyo, kaginuuhan, in usa nga pangandam han pyesta, nagpadayon an batan'on, — diri kay ginhuhunahuna ko nga iyo pakakasidngon nga maupay ngan iyo kakarawton; karuyag ko in pag-alagad gihapon han kaburut'on han kadam'an, kundi karuyag ko man liwat igpakita han katigurangan nga kami nakakapanhunahuna man hin sugad ha ira, tungod kay inaamon ngatanan an mga panhunahuna nga ha makaruruyag nga pamulong iginpahayag dinhi ni Kapitan Basilio.
—Maupay, maupay! —nagsiring an nagkakadadayaw nga mga konserbador. Hi Kapitan Basilio nagpipinaabat tikang didto ha antaw, han batan'on, kun uunanhon in pagdara han kamot ha pagyakan ngan han pagpitad han tiil. An waray gud la kaaalantad amo an gobernadorsilyo nga. nalilibang, o nagugupong ada, baga ngaduha la adto. An batan'on nagpadayon nahanunuyusoy na:
—An akon pangandam, mga kaginuuhan, asya ini: pagtukod hin bag-o nga mga kaliawan nga diri na an hinaaraan ug nababatasan nga nakikita ha adlaw-adlaw, ngan an pagtalinguha nga an salapi nga aton natirok diri gumawas dinhi hinin aton bungto, nga diri makarag la ha mga paburuthon ug mga susuritan kundi hagamit hin mga butang nga himurulsan han ngatanan.
—Asya ngahaw! asya! may hintangdo han mga tan'on asya ito an amon karuyag.
—Maupay ito! sinmagbang an katigurangan.
—Ano in makukuha naton dida hiton uusa kasimana nga komedya nga pinangangaro han tenyente mayor? Ano in aton hibabaruan pagkinita hin mga hadi ha Bohemia ngan Granada nga namamagsugo papamugot han ulo han ira mga anak nga daraga, kun ibabala man hin kanyon, ngan katima an kanyon nagigintrono? Diri kita mga hadianon, diri man liwat kita mga barbaros, waray kita mga kanyon nga kun aton ito panagsubaron panhikikugon kita ha Bagumbayan. Ano ito nga mga prinsesas nga nasalamok hiton mga araway, nga naasa hin tigbas paluyuluyo, nga nakikiaway hin mga prinsipe ngan nanlalayaw namamag-usaan
