ros aadto pamamagtuon hiton pakaraunan hin kabayo hiton padi. Asya ini an akon pangandam, ha halipot la nga
pangasoy; an pagpakaupay hito aada na han ngatanan.
Usa nga malipayon nga guruguro nadungog didto ha ruwang: haros ngatanan uyon han batan'on, may pipira la. nga may hinngurudo:
—Mga bag—o nga paagi! Kinabag-o! Han bata kami...!
—Tangdui ta na la ito anay! —nasiring an iba; —pahamaana ta adto. Ngan say tinutudlok an tenyente mayor.
Han pagmingaw na inabat nga ngatanan nauyon. An kulang na la an kanan gobernadorsilyo pagburut'an.
Ini iginpapamamalhas, waray himumurayaw, naghihinaruhapyod han agtang ngan kahuman nakangual, nagtitinamod:
—Ako uyon man . . . kundi, ehem! An bug-os nga tribunal namati waray aringasa.
—Kundi? —nagpakiana hi Kapitan Basilio.
—Uyon kaupay! liniwat han gobernadorsilyo; — karuyag ko sidngon... diri ako uyon... buot ko sidngon oo, kun....
Ngan paglusguson an iya mga mata han iya kamaoo.
—Kundi an padi, nagpadayon an hangahang nga gobernadorsilyo, —an padi lain an karuyag.
—Ano? An padi in nabayad han pyesta, o kita? Hinmatag na hiya bisan la usa kaguti? pinmur-ang in usa nga matil-is nga tingog.
Ngatanan naghinsiplat ngadto han tinitikangan hadto nga mga pakiana, ngan nakadto hi Tasyo an pilosopo.
An tenyente mayor waray pagkikiwa, say nabubuod han iya paniplat an gobernadorsilyo.
Ngan ano man in karuyag han padi? — nagpakiana hi Kapitan Basilio.
—Ada, karuyag han padi nga... unom nga prosesyon, tulo nga dagko nga misa . . . ngan kun mamaylabis nga salapi igpaguwa an komedya ha Tondo nga may kanta ha panungatunga . . .
—Ta, kami diri kami uyon! — nagsiring an mga batan'on ngan hin pira nga kalagasan.
—Asya an karuyag han padi — pulong han gobernadorsilyo. —Nagsaad ako han padi nga matutuman an iya karuyag.
—Kun asya ito, kay ano man nga imo pa kami gintirok?
