— May buaya! — may hinsiring.
An pulong nagsarang ha ngatanan nga baba upod in mga kahadlok ug panhipahungat.
— Ano nganimo? —naghinpakiana.
—Nasiring ako nga aadi in usa nga buaya nga sinmuhot, — nagdig-on hi Leon ngan say itinutugkad an karaptan han sikpaw: — Nabati kamo hadi nga taguktok? Diri ito baras, an matig-a ito nga hingbis dida ha bungkog han mananap. Naabat kamo nga nababantad inin mga tagik? Agi ito hinin buaya nga nagios, kundi nagkukuri kay nabuburon; bay’i anay. . . dako: mausa kadangaw, kun kapin ba, an kahalapad hinin lawas.
— Uunanhon ta man ito? — asya ini an mga pakiana.
-- Dakpon! —sinmiring in usa nga tingog.
— Hesus! Hino man in magdadakop hito?
Waray may nagpapasipara paglugsong ngadto ha tubig. Halarom kaupay.
— Aton unta ihihigot ha baluto basi ta pagyayungan!
— sinmiring hi Sinang; — asya hiya in nagkinaon han isda nga aton pangaran’on!
— Waray pa ako pakakita hin buhi nga buaya! — ngani Maria Clara.
An mag-urulin binmuhat, pinmurot hin usa nga pisi ngan sumaka ngadto ha papag han karitan. Inmisol hi Leon.
Labot kan Maria Clara, waray ngada hadto nga uras may nakapanginano ha iya: yana ira kinikita an mabakod niya nga kalawas.
Ha dako nira nga panhipahungat ngan bisan duro an ira pagsaway, kinita nira nga an mag-urulin inmambak ngadto ha sakob han karitan.
— Dad’a adin sipol! — ginuliatan ni Crisostomo nga hinmulbot hin usa nga hinganiban ha Toledo.(10) Kundi nagbubuladbukad na lugaring an tubig ngan an tawo nakadto na ha salad.
— Jesus- Maria y Jose! — may hinsiring han kababayin’an. — Mamamay-ada kita maraot nga hinabo! Jesus, Maria y Jose!
— Ayaw kamo kahadlok, mga ginang, — sinmumpay an taga baluto; — kun may ada ha lalawigan tawo nga maupay hito dumakop, amo hiya.
— Hino in ngaran hito nga batan'on? — namagpa-kiana.
