lab’an han tiyan han buaya ngan dida ha but-ol naurok,
naguot pa an sipol.
Diri haros matukib an kalipay: kadam'an nga kamot an kinmarawat ha ira pagpasakay ha sakayan. An kalagasan mga buang na haros, namamagtinawa ngan namamagpangadi. Hi Andeng nahangalimot na la nga an iya tulaan nakakatulo na susukob: ngatanan an sabaw isinukob ngan pinarong an kalayo. An waray la pakakayakan amo hi Ma ria Clara.
Hi Ibarra waray kasamdan; an paraulin may gutiay nga kakurisan ha butkon.
— Ikaw an binmawi han akon kinabuhi! — nagsiring kan Ibarra nga nag-aalikom hin mga taplak.
An tingog han paraulin baga may dara nga kasakit.
— Uraura ka kamapasiparahon, — binaton ni Ibarra; — ha sunod ayaw na sarihi an Dios. — Kun waray ka na hiutwal! . . . — namulong hi Ma ria Clara nga ginduduas ngan nangungurog pa.
— Kun waray na ako hiutwal ngan sinmunod ka ha akon! — binmaton an batan’on dapit paghuman han panhunahuna ni Maria Clara, — iginkakatarampo ako didto ha salad han akon kaurupdan.
Hi Ibarra waray hingangalimot nga didto ha salad aadto an mga tulan han iya amay.
An kalagasan diri na buot makadto han usa nga bunuan, karuyag na la makipanguli kay nasiring nga nagtikang kuno hin maraot tingali may umabot nga maraot nga palad.
— Tungod kay waray anay kita paningba! — nagbibinasol in usa.
— Kundi, ano nga maraot nga palad in inmabot, mga ginang? — nagpipinakiana hi Ibarra. — An buaya asya la in inabutan hin maraot nga palad!
— Tigaman ito, — hinumanan han nag-iipagparadi, — nga ha bug-os niya nga makasasala nga kinabuhi waray singba ini nga tampalasan nga mananap, waray ko gud ini hikit’i dida han kadam’an nga buaya (11) nga tigsulod ha singbahan.
An mga sarakyan nagtitipakadto han sunod nga bunuan ngan nagkikinahanglan nga hi Andeng maglaso liwat hin tulaan.
Nagtitidangan an adlaw; naghuhuyop an harupoy; nag-
