— "Tugot an mahatungod han liburan, an kalipungan nagdaog!"
— Ano in kahulugan hito? — nanmakiana.
— Diri ba nasiring kamo nga may suhol an makakarawat hin maupay nga baton? — pinmakiana, nakurog tungod pa han dako nga paghingusbo, hamtang gintutunga niya paggisi an telegrama.
— Oo! oo!
— Ta, asya ini an akon suhol, — nganiya ngan iya ihatag kan Maria Clara an katunga; magtitindog ako didto ha bungto hin liburan han kabataan; ito nga liburan asya an akon suhol!
— Ngan iton usa nga katunga, ano man ito?
— Ini ihahatag ko han nakakarawat han gimarauti nga baton!
— Ada hi ako! Akon ito kun asya man! — ginmuliat hi Sinang.
Ihinatag ni Ibarra an papel nga pinit ngan pumaharayo.
— Ano man in karuyag hini sidngon?
Kundi an malipayon nga batan'on nakadto na ha hirayo, tikadto pagtapos han uyag nga ahedres.
Hi Fr. Salvi, sugad hin baga waray la hiya sabot, napaharani ngadto han marugyaw nga pundok han mga batan'on. Hi Maria Clara nagpipinamahid han luha ha matanga dara han kalipay.
Dida han pag-abot niya hinmunong an katatawa, inmukoy an karukayakan. An padi nagkikinita han mga batan'on waray hitutultol kun ano in pamumulungon; ginhihinulat hiya nga hitinggan, salit waray may nagyayakan.
— Ano ini? — nakagyakan na ngahaw, pinurot an basahan ngan pagpinalipalion.
— La Rueda de la Fortuna, uruyagan nga basahan, — binmaton hi Leon.
— Diri kamo nasabot nga sala an pagtuod hini nga butang? — sinmiring ngan paggision an mga paypay, nangingisog.
Mga tingog hin panhipausa ngan kaurit binati ha ngatanan nga im-im.
— Darudako nga sala an pagparabuot han diri iya patok han kaburut'on han tag-ada!iginmugo ni Albino nga binmuhat. Padre, asya ito an sinisiring nga panikas ug an Dios ngan han mga tawo nagdidiri hito.
