Hi Maria Clara tinmakpo han iya mga kamot ngan pagkinitaon hin matangistangis nga mata an mga kapinit han basahan nga diri pa la maiha nakahatag ha iya hin kalipayan.
Hi Fr. Salvi, patok han ginpapamulat han kadam'an nga mahananabo, waray baton kan Albino; nagkinita la han nagkakalupad nga mga pinit nga papel, nga may nanhipalid ngadto ha kakahuyan, may ada ngadto ha tubig; katima lumakat naghihipariigdiig, ibinabawbaw ha ulo an mga kamot. Inmukoy nadaliay, nakighinimangraw kan Ibarra anay ngan binmunyog hini ngadto ha usa nga sarakyan nga magdadara ha iya o manunul-ong han mga kumbidado.
— Maupay kay nalakat ito nga mamurungkag hin kalipay! — nagngurudo hi Sinang. — Iton kahimo baga nasiring: "Ayaw hin tawa kay maaram ako hiton imo mga sala!"
Hi Ibarra, katima hatag ha iya higugmaon han iya saad nga suhol, baga in tinmukal ha tuna hin kalipay nga nagpaturon hin uyag han ahedres hin waray la pada ug waray parupanginano kun nauunano na an kamutangan han iya mga bato. An inabutan han uyag asya ini: bisan hi Kapitan Basilio nagkukuri na hin pag-ilinilikayan han iya hadi, an uyag nagtikatupong tungod han damo nga sayop han batan'on,
— Diri, diri hananayon an kalipungan! — nasiring hi Kapitan Basilio, nalilipay na.
— Diri igpapadayon an kalipungan! sinmubad an batan'on, bisan kun tipaunano an larang han mga hukom.
Naglamano hira ha dako nga paghinangop.
Dida han ginkakaarangayan han mga tambong hini nga kahumanan ha maupay nga kaburut'on hin usa nga kalipungan, nga ginkakauuyaman na han magkaluyo nga bahin, inmulpot hin tigda in upat nga sibil ngan hin usa nga sarahinto, tagsa ha ira may pusil nga tinal-uban hin bayoneta, ngan nakasamok dayon han ira kalipay ngan nakadarahig hin kalisang didto han gin-aalirungan han kababayin'an.
— Waray magkiwa! — sinminggaak an sarahinto. — An magkiwa pabubuthan ko!
Patok hini nga waray haros nga panarhog, hi Ibarra binmuhat ngan dumuok ha iya.
— Ano imo tuyo? nanginsayod.
