adlaw nga mauran, iginhisugat an alperes hin usa katawo nga nagpapas-an hin isurungo. Damo an lamsaw ha dalan ngan nakadto la ha piliw an nahihimo kaagii ngan uusa la katawo an nakakaagi. Nasiring nga an alperes, nga angay unta pumaukoy han iya kabayo, naghanda lugod ngan ginuliatan an tawo nga umisol: an tawo baga waray karuyag pagbalik han iya na inagian tungod han iya pinapasan ha sugbong, o diri ba adto buot mag-ubog han lagay, nagpadayon la han lakat. An alperes, nangingisog, hinmagyo hin pagpatara han tawo han iya kabayo, kundi an tawo kinmapet hin usa nga tiak ngan bunalan hin makusog dida ha ulo an mananap nga natumba iinapyat an sumarakay ngadto ha libaong. Nasiring liwat nga an tawo nagpadayon la han iya lakat, waray pakaalantad han lima nga bala nga tikang didto han kalagyan iginpasunudsunod ha iya hin pagpabuto han alperes nga napuputos hin kasina nganhin lapok. Tungod kay an tawo diri kinikilala, gintahapan nga amo an bantog nga Elias nga may pira pa la kabulan nga naabot nganhi ha lalawigan, ambot kun tikang diin, ug nga nakadamo na pakilala han mga sibil, didto ha iba nga bungto, hin, sugad ngahaw nga paagi.
— Tulisan ngayan? - nagpakiana hi Victoria, nahahaldok.
— Sabuot ko diri kay isinusumat nga inmato na kuno ito hin mga tulisan nga ha usa kaadlaw nanikas didto hin usa nga balay.
— Diri kanan maraot nga tawo an dagway! — sinmumpay hi Sinang.
— Diri, lugaring kay iton paniplat kanan mabiduon: waray ko gud hikit'i nga humiyom han bug-os nga aga, — nagsiring hi Maria Clara, dako an painuino.
Dida hini nahagos an kakurulpon ngan inmabot an uras han pagpanguli ha bungto.
Nagkalakat hira didto han kakahuyan han nagtitikasirom na an silaw han tikatunod nga adlaw, inmagi hira, waray aringasa, dida han urusahon nga linubngan han katulinan ni Ibarra. Katima, an marugyaw nga hiruhimangraw binmalik, makusog, maluya, ha tungod han mga sanga nga diri hiara mamati hin kadam'an nga tingog. Daw magsamdong an kakahuyan, an mga balagon namamag-aruabyog sugad hiton nasiring; "Maupay nga pag-agi, mga batan'on! Maupay nga panlabay, inop ha usa kaadlaw!"
Ngan yana, ha kalambragan han maglaga nga dagko
