ngan bakay kay in usa nga dako nga pagkadoktor ha Santo Tomas nahanunumdom pa han pamulong, nakausa, ni Papa Inocencio III nga nasiring nga an mga lagdaan nga turumanon hini nga Orden angay la han kababuyan, nga diri hira ngatanan nag-uurusa pagsiring, sugad han pinamulong hin usa nga Procurador nga: "An gipupukisi nga lego makakalupig pa han Gobyerno ngan han iya kasundaluhan." Cave ne cadas (2) An salapi makagagahom; an Dios nakadamo na huluga dida hiton iya altar han tudo nga bulawan, ngan ini tikang pa ha panahon ni Moises.
— Diri ako sugad hito kahulupanon ngan diri ko sugad hito hin kataragmanan pagkit on an akon tuna, —binmaton hi Ibarra nagtitinawa. An ha akon nga bahin, baga nalabis hin gutiay ito nga mga kahulop, ngan naglalaom ako nga matutuman ko inin akon mga panalinguha hin diri ko igkikita in mga makauulang dida hito nga bahin.
— Oo, kun buligan ka nira; diri, kun diri hira ha imo tumabag. Ngatanan an imo mga pangahas mapatok la dida hiton mga kuta hiton kombento kun bisan bantaron la han padi iton iya bakgong o iyabyab man iton iya sutana; an alkalde, ha bisan la ano nga hipatungdan, magdidiwara buwas han itinugot ha imo yana; waray iroy nga matugot pagpabutho ha liburan; dida hini, ngatanan an mga kagul'anan mo nawaray la maupay nga himurulsan: ha urhi mahuhulop an iba hin pagpalakat hin mag-upay nga talinguha.
— Bisan pa, nahapagbaton an batan'on. —diri ako matuod hito nga gahom nga imo sinisiring, ngan bisan pa, pananglit, itugot ta nga matuod, aadi pa gihapon ha akon gagapil an bungto nga maaram mamurubuot ug an Gobyerno nga may dara nga maupay nga katuyuanan ngan may dako nga pagtamod ug paghingyap han kaupayan han Pilipinas.
— An Gobyerno! an Gobyerno! (3) - hinmutib an baba han pilosopo ngan hinmangad ngadto ha atop. —Bisan pa dako an kaburut'on hin pagpadako hini nga tuna, ha iya kaupayan ug han kaupayan han Iroy nga Tuna, bisan pa an maupay nga panuyo han mga Hadi nga Katoliko hinumduman hin usa, kun pira ba nga punuan, ngan iya hinabihan ha iya pag-usaan, an Gobyerno diri nakita, diri nabati, say la ginmamatuuran an ipinakikita ug ipinababati ha iya han padi o han probinsyal man; nagmamatuod gud nga an
