Dida hini ngahaw nagsasayop hiya: adto nga komedya maiha na nga nagtitikang.
lini kita ha ika-10 han Nobyembre nga asya an kulop ngan asya an bispiras han patron.
Dapit paglutod dida han kabatasanan nga kamingaw, an bungto inmatubang hin duro nga buruhaton ngan kiot nga waray makasusugad ha sakob han balay, ha kalsada, ha singbahan, ha bublangan ngan ha huron: an mga tangbuanan pinanablayan hin mga bandera ug mga damasko nga magkalainlain an tina; an walog napupuno hin mga pabuto ug mga musika; an hangin sinasalakayan ngan inaalop hin mga kalipay ug kamaribhong.
An magkalainlain nga bunga hin kahoy nga pinanhimo nga mga magtam-is nga ipinanulod ha mga dulsera nga salaming nga magpakaruruyag an tina iginbubutang han daraga ha usa nga mesita nga minantilan hin busag nga binurdahan. Didto ha sirong nangingiyak an kapisuan, namamagkakak an kaugangan, may hinpiyait han kabaktinan nga pinanngangalasan han duro nga kamarugyaw han mga tawo. An mga suruguon naghihinsaka-lusad, namamagdara hin mga garamiton nga binulawanan ngan hin mga salapi nga kubyertos: nganhi dapit may nasisinahan tungod han kabuong hin usa nga pinggan, ngadto ha unhan gintatawaan in usa nga hurunanon: bisan diin may sugo, may huringhuring, may gugliat, may pasumatsumat, may pasusunsuson, may paaruagda ngan ngatanan masamok, maaringasa ngan maluya. Ngan ini ngatanan nga pangarit ngan ini ngatanan nga kabudlay tungod la han sumasaka, kilala o diri; tungod la han panagtawo han bisan kanay nga tingali waray ngani pa igkita kakano pa man, ngan unina diri na makikigkita; basi an dumuruaw, an taga lain-tuna, an sangkay, an kaaway, an pilipinhon, an katsila, an kablas, manggaran, tumunga ug malipay: diri ngani gin-uungad'an nga managpasalamat, diri ginlalauman nga diri pagpapakarauton an maabiabihon nga tagbalay yana, kun unina man, tima na kabusog! An mga manggaran, an nanhingadto na ha Manila ug nagpakakita na didto hin lunlon kiritaon, nanmalit hin serbesa, tsampan, mga alaksiw, mga irinmon ug
