ciencias"(4) ngan ngadto pa ha uruubos "El espanol filipino" ngan iba pa. Naghihilabhikab an ginhawa ni Kapitan Tiyago pag-imakasusubad ngan naghunahuna nga tingali man kun kaangayan ba nga hiya magtindog man hin usa nga kombento hin iya kalugaringon nga salapi.
May mga pira na kaadlaw nga naabot ngadto han balay nga inuukyan nira Maria Clara ngan hi iya Dada Isabel in kadam'an nga mga kinahon nga irinmon ug mga karan'on ha Europa, mga dagko nga espeho, mga kuwadro ngan han piyano han batan'on nga daraga.
Hi Kapitan Tiyago inmabot hadto nga kulop han pakaburuwason han patron; han paghadki ha iya han iya anak dida ha kamot iya dayon ihinatag in usa nga relikaryo nga bulawan nga binatuan hin mga brilyantes ug mga esmeralda ngan hin usa kapinit han sakayan ni S. Pedro, didto dapit han liningkuran han aton Ginoo hadto han panlaya.
An pagkita nira ngan han iya maurumagad waray na masugad hin kamahinasa: kaiya na gihapon, naghinabi hira han liburan. Hi Kapitan Tiyago karuyag nga pagngaranan nga liburan ni San Francisco.
— Tuod la ha akon! nasiring. Hi San Francisco maupay nga arampuan! Kun pagngaranan mo ito hin Instruccion Primaria waray mo pagpupulsan nga ano man. Hino hi Instruccion Primaria?
Nagkaabot in mga kasangkayan ni Maria Clara ngan ini gindara nira ha pagkalakat.
— Kundi, uli layon, gintugon ni Kapitan Tiyago an iya anak han panarit paglusad; —maaram ka nga hahani niyan nga gab-i paninihapon hi P. Damaso nga pag-aabot pa la.
— Ngan say atubangon hi Ibarra nga nahapagpamurubuot:
— Dinhi man ikaw niyan panihapon ha balay, didto ha iyo mag-uusaan ka la.
— Dako akon karuyag, lugaring kay kinahanglan nga maadto ako ha balay kay bangin magkaabot in mga sumasaka, binmaton an batan'on nga naglilinikay han paniplat ni Maria Clara nga nagbubutang hin peineta ha atubangan han panganinawan.
— Dad'a la nganhi iton imo kasangkayan, —diri napabaribad hi Kapitan Tiyago; —dinhi ha balay may pagkaon ha
