mat; unina pinupurot niya an iya gubong ngan dayon pasisingadto ha antaw ngan buhaton liwat niya didto in sugad.
Hi Maria Clara nakasiring nga may ada nasusugaran salit nagpakiana kun inaano adto nga malain la pagkit’on nga tawo.
—Amo ito an sanlahon,(8)— binmaton hi Iday. —May upat na katuig nga nagdidinaradara hiya hito nga sakit; nasiring an iba nga tungod han pagminangno kan iya nanay, an iba nasiring nga didto ito niya kakuha ha usa nga mahulos nga bilangguan. Aadto hiya uukoy ha huron, ha harani han panlubnganan han kainsikan;(9) diri iginkakahirani bisan kanay, ngatanan napahirayo ha iya kay nahadlok nga tapunan. Kun makakakita ka hiton inuukyan nga balay! Amo gud an balay ni Giringgiring: an hangin, an uran, an adlaw, nasulod naguwa didto, sugad han dagom dida han tinahi. Gindidid’an hiya hin pagsaping han bisan ano nga kanan iba tipig. Usa kaadlaw may nahulog nga bata ngadto ha kali, diri halarom an kali, kundi iginkaigo nga nalabay hiya, iya an bata binuligan pagguwa. Nahabaro an amay han bata, nagsumbong ha gobernadorsilyo ngan ini nagsugo nga paglambahon an sanlahon maunom kalapdos dida ha butnga han kalsada ngan ipasunog unina an uway nga iginlamba ha iya. Makalilisang adto nga kasugad! Kay an sanlahon nagdidinalagan paglikay ngan ginlalanat ha luyo han naglalamba ngan han gobernadorsilyo ngan ginuguliatan hin: “Tigamni! gabay may malumos ngan diri an mga tawo magkasasakit hin sugad ha imo!”
—Matuod na man liwat !— nakasiring hi Maria Clara.
Ngan, daw haros waray sasabot han iya binubuhat, dinmalidali hiya pagdaop ngadto han singlot, hadto nga waray palad, ngan ibutang niya didto ha sakob an relikaryo nga paghahatagan pa la ha iya ni iya tatay.
—Ano imo binuhat?— ginpakianhan hiya han iya kasangkayan.
—Waray ko iba nga dara!— binmaton nahiyom, pagtago dapit han luha dida han iya mga mata.
—Ngan ano in mahihimo niya hiton imo kuwintas?—sinmiring hi Victoria. —Hadton usa kaadlaw tinagan hiya hin kuwarta, kundi iya la iinantaw, idinuso han kawayan; ano in gagamitan niya hin salapi hin waray hito makarawat dida ha iya? Maupay kun mahakaraon iton kuwintas
Hi Maria Clara sinmiplat hin kaawa ngadto han kaba-
