siring nga maghinayhinay anay ngan diri la hin tingol kay baga say may labot hini nga kasugad an Guardia Civil. Nangangalinsakob kaupay iton padi hito nga tuyaw!
—Diri ba nasiring an alperes nga igpapabiling niya an kabataan?
—Oo, kundi hadto, dapit hiya. . . hubughubog! Igo nga nakakatapos hini nga pamulong hinkit’an niya nga an tuyaw ginguguyod haros hin usa nga sundalo: hi Sisa nagkukuri pag-upod.
—Kay ano in iyo pagdakpa? Ano in binubuhat?—nagpakiana hi Ibarra.
—Ha? Waray ka pakakita nga nakakaaringasa?—binmaton an magbarantay han pagkamingaw han bungto. An sanlahon pinmurot hin dalidali han iya gubongngan lumakat. Hi Maria Clara nag-iuruli kay nawad’an dayon han iya kamalipayon.
—May ada man ngayan mga tawo nga waray kalipay!— nagsiring. Han pag-abot niya ha purtahan han ira balay dumugang an iya kasubo han pagsabot nga an iya higugmaon nagsasarit, diri na buot sumaka:
—Kasuruk’an ko gud!— nagsiring hi Ibarra. Hi Maria Clara sinmaka, nag-iinisip-isip hiya han kamakauurit panumdumon han mga adlaw hadto nga patron nga damo in mga sumasaka nga mga taga lain nga bungto.
“Cada uno habla de la feria
comole va en ella".(1)
Tungod kay waray man nahinabo han aton mga tinawo nga sadang ta himangrawan, hadto nga gab-i han kaburuwason han patron sugad man han pagkabuwas, aton na la unta lalaktawan ngadto ha katapusan nga adlaw kun diri la an paghunahuna nga bangin mamay-bumarasa nga taga lain-tuna nga maruyag hin kasayod kun tipaunano an pagsaurog han mga pilipinhon han ira mga kaadlawan. . . Tungod hini, susubdon ta na la in mga pipira nga surat, usa hini asya an kanan korresponsal hin usa nga mananong
