nabihan han makugi nga korresponsal, an ginkalainan la kay hi P. Salvi niyan an selebrante ug dida han mga maniringba nga magkikita ha iya hatatampo an Alcalde ha lalawigan ngan hin iba pa nga kakatsilaan ug mga mag-aram kay dara liwat hini an pamati kan P. Damaso, kay dako in bantog ha lalawigan. Bisan an alperes nga maan na han mga winaliwali ni P. Salvi sinmulod ha singbahan pagpakita han iya maupay nga kaburut’on ug panimulos man liwat, kun daw mahimo, han magraot nga uras nga iginhatag ha iya han padi. Bantog kaupay hi P. Damaso kay an korresponsal daan na nagsurat ngadto han magwaraydong han pahayagan hinin masunod:
“Sugad ham iginpasiuna ko na ha imo nga sumat didto han diri sandag nga akon mga rumbay kakulop, asya man an nahinabo. Iginkapalad kami hin pamati han M. R. P. Fr. Damaso Verdolagas hadto anay padi hini nga bungto ngan yana nabalhin ngadto hin darudako, balos han maupay niya nga pagdara han iya katungdanan. An batid nga magwarali ha singbahan tinmungtong ha tungod han Espiritu Santo(7) ug namulong hin usa nga tukib ug halarom santupon nga wali nga nakapadig-on han pagtoo ug nakapapanhungat han mga matinumanon nga namamaghulat nga bumutho dida han iya malinuwason nga mga im-im an burabod han dayon nga kinabuhi. Mahinhin ha pagpahamtang han mga pulong, makaaramdok ha panhunahuna; kinabag-o ha pagluwas; pusuan ha pamulunganan, kinaiya ha pangiwakiwa, maupay la pagkit’on ha pagyakan, madig-on ha sinasantupan han pulong, asya ini an mga rayandayan han Bosuet nga espanyahanon nga hataas na kaupay an dungog nga gindadara diri la dida han mga mag-aram nga kakatsilaan, kundi dida man liwat han mga timawa nga mga mdiyos ug mga mag-ikmat nga kainsikan.’’
Kundi, an matinapuron nga korresponsal gutiay la magpara han ngatanan nga iya ginsinurat. Hi P. Damaso nagmiminugo nga may gutiay niya nga sip-on tikang pa kagab-i: kay kataliwan la niya kanta hin pira nga maglipayon nga peteneras, uminom hin tulo kabaso nga sorbete ngan magkita nadaliay han paguwa. Tungod hini nga kasugad karuyag unta hiya magbaribad nga diri na la hiya say magdara han mga pulong sa Dios ngada han katawuhan, lugaring kay waray man hinpapaibhan nga tanog han kinabuhi ug mga milagros nga nabuhat ni S. Diego, — ma-
