226
tag bin damo nga indulhensiya han minatay nga pagsasaputan, marumahal in bayad kun uraura na kadaan, kagusigusi ngan kadiri na haros gamiton. Iginsusurat namon ini bangin pananglit in usa nga makidiyos nga bumarasa magkinahanglan hito nga mga birilhon nga mga sapot, kun in usa man nga malisbot nga nagtatagadugnit ha Europa maruyag hin pakasalapi, magdara la ngadto ha Pilipinas hin usa kakarga nga mga sutana nga sinursihan ug maghugaw kay danay mapalit didto tubtob ha tinagpulo kag-unom kapisos, danay ngani labaw pa, kun pananglit kunitkunit na pagkit’on ngan igo la kamahugaw.
Hi San Diego de Alcala nahatutungtong hin usa nga karro nga rinayandayanan hin mga likop nga salapi nga sinilsilan. An Santos nga magasaay marpil an lawas ngan kanan maisog ug makatarag-ob an panagway, marabong ngan kurong an buhok, sugad han kanan mga ita. Raso an biste nga binurdahan hin bulawan.
Nahasusunod ha iya an aton talahuron nga Amay, hi San Francisco, ug ha luyo hini an Virgen, sugad kakulop, an ginkakalainan la kay an padi nga nabunyog ha sirong han palyo hi P. Salvi, diri na an angayan nga P. Sibyla. Kundi bisan hi P. Salvi kinukulangan hin tindog, napupuno lugod hin pagkadiyusnon nga bakdaw: binibindito an iya mga kamot, itinatamod an mga mata ngan dapit nakaob an paglakat. An namamagdara han palyo amo la gihapon an mga ginhaupan nga ipinarnamagbalhas ha kalipay nga hira irog han pagkatanod, kaparapanukot hin buhis, parapanubos han mga kablas ug mga timawa, ha usa kapulong, mga Kristo nga namamag-ula han ira dugo, tungod han mga kasal’anan han iba. An kuwadhutor nga nasobrepelis nagsusudoy han mga karro, nabitbit hin insensaryo nga asya an iya danay igpaaso ha pasngawan han padi nga dayon dudugang hin paghimuot ug pagkuriot.
Sugad hini an lakat han prosesyon, mahinayay, dinuduyugan han mga luthang, mga kanta ug mga diniyusnon nga tunog nga iginhuhuyop han mga banda hin musika nga bunyog ha luyo han tagsa nga karro. An Hermano Mayor nangangarit han panhatag hin mga kandila, salit da mo in mamurunyog nga nagpapanguli ha ira balay may mga dara nga suga nga iginsisiwak hin kanan upat kagab-i nga surusgal. An mga magkirita ha kalsada nanluluhod ngan nangungudos kun inaagian han karro han Iroy sa
