243
XXXIII
AN BALAYAN
An madarag nga tawo nagtuman han iya pulong: diri kay yano la nga balayan an ginhimo ha tungod han luong nga say pagtuturusan han dako hin duro nga bato: diri an tutulo la in tuko nga balayan nga ginhuhunahunaan ni Nyor Juan nga bibitayan han muton didto ha kapupungtan han tutulo nga tuko, kundi darudako pa; diri la kay balayan, kundi makina gud nga dapit sabong pa liwat, kundi sabong nga dako ug makatarag-ob.
Labis hin wawalo kametros an kahataas han masamok ug makalilipong pagkit'on nga mga gipat nga nagbabalag; uupat nga dagko nga gipat nga nanhihiusok ha tuna amo an nagigintuko, nga pinadidig-unan hin mga bahol liwat nga balabag ngan ginturugkop ngatanan hin mga bahol nga raysang nga tubtob la ha katunga an pagpadulot, tungod ada kay an balayan diri man dayon, masayon unina in pagtanggal. Mga bahol nga pisi, nga nanhihiguos ha mga luyuluyo, asya in nakakahatag hin karig-on ug katag-ob han kabug-usan han buhat, nga ha bawbaw pinanmutangan hin magkalainlain in tina nga mga bandira ngan hin dagko nga hugpong hin mga bukad ug mga dahon nga magpakaruruyag pagkit on.
Didto ha igbaw, didto han nalalambungan han mga gipat, mga bukad ug mga bandira, hinigutan hin mga pisi ug nahasasab-ong ha mga kawing nga puthaw, nabitay in usa nga gidadakui nga muton nga tutulo in sangatan, nga nagiinggat ug nasasab-ungan hin tutulo nga pisi nga bahol pa kaupay han iba ug say nakakabitay han barag-alan nga silyar nga linuhaban ha butnga basi dapit magintakop hadton sugad man liwat kadako nga bato didto ha luong, nga linuhaban man liwat, nga amo an hihimusan han sinurat nga mga kaagi hini nga adlaw, nga amo an mga pahayagan ngan hin iba pa nga mga sinurat, mga medalya, salapi ngan iba pa, basi mabasa han sunod nga mga katulinan. Ini nga mga pisi nga nanhihisangat man liwat didto hin tugbang nga muton ha ubos han balayan, dapit nahahanay hin tipaigbaw ug tipaubos ug layon nanhihigaod didto hin usa nga likisan
