higayon nga diri na sadang ig-asoy pa ha iyo an iya kadako nga himurulsan. Asya an pagtukod hin usa nga liburan; an liburan asya an ginikanan han katig-uban han mga tawo, an liburan asya an mga paypay nga ginsusuratan han kabubwasan han mga bungto! Pakitaa ako niyo hin liburan
hin usa nga bungto ngan pagsusumatan ta kamo kun ano
ito nga bungto.
"Mga taga San Diego! Igpasalamat niyo sa Dios nga tinagan kamo hin magtadong kaupay nga kapadian, sugad man magpasalamat kamo han Gobierno ha Espanya nga diri ikinahihirak an pagpasangyaw han kalambragan dida hini nga kapurupud'an nga sinasakop niya han iya mahimayaon nga kurugpos! Pagpasalamat kamo sa Dios nga tungod han iya kaluoy tinagan kamo hinin mapinaubsanon nga kapadian nga say ha iyo nagpapahayag ug nagtutdo han diyusnon nga pulong! Pagpasalamat kamo han Gobierno nga nangahas, nangangahas ngan mangangahas pa, tungod ha iyo ug han iyo mga anak!
"Yana nga iginbubutang ta an siyahan nga bato hini nga hinurumduman nga balay, ako, an Alcalde Mayor hini nga lalawigan, ha ngaran ni S. M. an Hadi, nga tungod ha kaluoy sa Dios, asya an naghahadi ha bug-os nga Espanya, ha ngaran han dungganan nga Gobierno nga espanyahanon ngan sakop han iya putli nga bandera, akon hinahalaran ini nga buhat yana nga asya an pagtikang pagtindog hini nga liburan!
"Mga bungtuhanon ha San Diego, mabuhi an Hadi! Mabuhi an Espanya! Mabuhi an ngatanan nga kapadian! Mabuhi an tuluuhan nga katoliko!"
—Mabuhi! Mabuhi!! —binmaton in kadam'an nga tingog. —Mabuhi an Senyor Alcalde!
Linmusad ini ngadto ha luong hin makatarag-ob nga biksal nga dinuduyugan han tuktok han musika; binmu- tang hin pira kasakwit han inunaw nga ikuruta dida ha bato, katima sumaka hin sugad gihapon kamakatarag-ob nga bakang.
An mga empleado nanmakpak.
An padi dinulhan man liwat ni Ibarra hin lain nga sakwit nga salapi, nga katima siplat ha iya nadalikyat, naghinayhinay paglusad. Ha tungatunga han hagdan hin- mangad pagsiplat han bato nga nabibitay ha iya tungod, nga hinihigutan han mga bahol nga pisi, kundi usa la kadali
