ngan igpadayon an paglusad. Sugad han binuhat han Alcalde amo man an iya binuhat, kundi darudamo an namakpak ha iya: sinmabat han mga empleados an mga prayle ngan hi Kapitan Tiyago.
Hi P. Salvi nalingat sugad hin may ginbibiniling nga iya dudulhan han sakwit; sugad hin nagruruhaduha sinmiplat kan Maria Clara, kundi liniwat an panhunahuna, say dinulhan an Escribano. Ini, dara han pagpalabi han babayi, pinmaharani kan Maria Clara, kundi hiniyuman la, waray karawti han sakwit. An mga prayle, an mga empleados, an alperes, ngatanan nanlusad ngadto, tig-usausa. Hi Kapitan Tiyago waray man hingalimti.
Hi Ibarra na la in waray pa, ngan pinapapagturusan na unta adto han madarag nga tawo an bato, lugaring kay an padi nahanumdom han batan'on ngan amo an nagsiring ha iya hin dapit uyag nga tingog sugad hiton nakikipaghinasa pakisangkay:
—Diri ka man masakwit, Sr. Ibarra?
Masusugad daw ako kan Juan Palomo,(3) akon pangalayo, akon pagkaon! —binmaton ini hin sugad nga tingog.
—A, kadtuna, hala! —sinmiring an Alcalde, dapit hiya itinikwang hin mahinay; —kun diri, di ko patuturusan iton bato basi kita dinhi managhinulat tubtob ngada ha adlaw han paghukom.
Tungod hini nga makalilisang nga tarhog sinmugot hi Ibarra. Binalyuan niya an sakwit nga salapi hin usa nga sakwit nga puthaw ngan darudako, nga asya an ginkata-tawaan hin pira katawo, ngan magtilusad hin waray kaalantad. An siplat ha iya ni Elias diri sadang matukib; daw sugad hin nakadto ha iya mga mata an iya bug-os nga kinabuhi. An madarag nga tawo nagtitinamod han kahiladman nga iya hintutunguran.
Hi Ibarra, katima niya siplat han bato hin dalikyat, nga nabibitay ha tungod han iya ulo, ngan hin usa nga siplat kan Elias, sugad man han madarag nga tawo, sumiring kan Nyor Juan hin tingog nga dapit nakurog:
—Iduhol iton sarok ngan igbiling ako didto ha igbaw hin lain nga sakwit!
Nag-uusaan la didto an batan'on. Hi Elias waray na ha iya sisiplat: say na dinudultan han iya mga mata an madarag nga tawo nga nagtitinamod han kutkot, nag-iininaw han ngatanan nga kiwa han batan'on.
