Nababati an aringasa han sakwit nga igin-uukay han inunaw nga baras ngan apog, nga nalutaw dida han hinay nga hinutibhutib han mga empleados nga nagdinayaw han Alcalde tungod han iya pagyakan.
Waray kaiha manhirumpag: an muton dida ha ubos han balayan nautdan han higot, linmabtik dara an likisan nga say binmunal han balayan sugad hin pakang: dida hini an mga gipat nabahid, nagkauutod an mga guos ngan ha usa kadali nahagun-ob an ngatanan hin makalilisang nga paghirumpag. Nagdampog an taputapo; an guliat han kadam'an binmug-os, nagin-usa nga kuligi ha dako nga kangirhat nga nakapuno han hangin. Haros ngatanan nagdadlagan ug nanmalagiw, diri damo an dinmangkulos ngadto ha luong. Hi Maria Clara la ngan hi P. Salvi an waray pakakiwa dida han ira hintutukdawan, ipinamamagduruas ngan waray pagpapakayakan.
Han pagpawa han taputapo hinkit'an hi Ibarra nga natukdaw ha butnga hin mga gipat, kawayan, pisi, dida han ginkakaalupitan han likisan ngan han bato nga tikang hat igbaw, nga han kahulog hin tigda asya in ginmuod ug ginmuba han ngatanan. An batan'on nakakadara pa ha iya kamot han sakwit, ngan say ginkikinita han iya nabuburarat nga mga mata an lawas hin usa katawo nga nahuhutang ha iya mga tiil, dapit natatak-upan han mga tigkahoy.
—Waray ka kamatay? —Buhi ka pa? —Pastilan, pag yakan daw! Asya an pasunudsunod nga naluwas han mga empleados nga nagkakalilisang ngan duro an pangalinsakob.
—Milagro, milagro! —an guliat han iba.
—Kadi, bukwata niyo inin lawas hini nga waray palad! —sinmiring hi Ibarra, sugad hin nahamamangno ha usa nga inop.
Han pakabati han iya tingog hi Maria Clara inmabat hin panluya han iya lawas ngan dayon katumba ha mga butkon han iya kasangkayan.
Duro an pagsalamok: ngatanan nagyayakan, nanwa- waay han kamot, nadalagan ngadto, nadalagan ngadi, nalusad ngadto ha kutkot, nasaka, ngan ngatanan nalilisang ngan nangingirhat.
—Hino in patay? Buhi pa? —nagpipinakiana an alperes.
Kinilala nga an patay amo an madarag nga tawo nga
