kanina natukdaw ha tupad han likisan.
—Ipadakop dayon an puno nga panday! —asya an siyahan nga naluwas han Alcalde.
Gin-usisa an lawas han patay, dinun'an an dughan, kundi waray na pagpuputok an kasingkasing. Dida kaigo ha ulo ug an dugo naagi ha iya irong, baba ug mga talinga. Kinita nira ha liog in mga urusahon nga lupot: upat ha dapit luyo, nga haglarom, ngan may tugbang nga uusa la ngan darudako: sugad hin daw pinitlok hin usa nga kamot nga puthaw.
An kapadian namagpahalipay han batan'on, ngatanan nakiglamano ha iya. An pransiskano nga mapinaubsanon an dagway nga asya an nagtamod kan P. Damaso han pag- wali, nagsiring, iginpapanluha an mga mata!
—An Dios matadong, an Dios maupay!
—Kun nahanunumdom ako nga diri pa la maiha nakadto ako! — nagsiring kan Ibarra in usa han mga empleados. Kun ako in naurhi, Hesus!
—Namamarat iton akon barahibo! —nagsiring in usa nga darudangas na.
—Maupay na la kay ikaw in nasugad hito, diri ako! —nakagmugo in usa nga tigurang nga nakurog pa an lawas.
—D. Pascual! —nagdurungan pagmugo in pira nga kakatsilaan.
—Nagsiring ako hito kay hiya waray kamatay! Ako, diri na man naipit, napatay ako bisan ha pagpinanumdom la han kasugad!
Kundi hi Ibarra nakadto na ha hirayo panginano han kamutangan ni Maria Clara.
—Sr. Ibarra, diri ini unta makabungkag han pyesta! —nagsiring an Alcalde; —salamat sa Dios! an namatay diri padi, diri man liwat katsila! Angay igkalipay an paghigawas mo! Hunahunaa kun hindat-ugan ka didto ha ubos han bato!
—May ada gud pagpamaba, may ada gud! pulong han Escribano; —nasiring pa ako! Diri gud kaburut'on ni Sr. Ibarra adto nga paglusad. Daan la ako nagsiring!
—An namatay usa la nga indiyo!
—Igpadayon an kalipay! Magtuktok an musika! diri makakabanhaw hiton minatay an mga kasakit! Kapitan, dinhi an angay ig-usisa hini nga kasugad!.. Tawaga an di-
