nga nakadto didto ha harani, hi ako, kinaptan ko an tampalasan tinupdan ko: hiya in pinatay, ug ako waray kaano.
—Ikaw? kun sugad, ikaw. . . ?
—Oo, kinaptan ko kay nag-iikaralagiw han nagtitikang na kahimo an iya buhat nga waray haros: hinkit'an ko. Salit nagsiring ako ha imo: an Dios la an matuod nga hukom, amo la Hiya an angay maghukom han aton kinabuhi; diri gud an tawo maghunahuna pagsaliwan ha Iya!
—Kundi ikaw, hini nga kasugad...
—Diri! —inmulang hi Elias daan na nasabot han pulong, —diri ako sugad. Kun an tawo naghuhukom hin pagpatay han igkasitawo, kun pagpara man han iya kabubwason ha kadayunan, binubuhat niya hin waray karit ngan nagawi hin kusog han iba ha pagtuman han iya mga kaladnganan nga ha katapusan bangin kun nanhihilisa, diri nanhihituon. Kundi ako, han pagtunguran ko han tampalasan didto han kataragman nga igin-andam han iba nga tawo, nahatutungod man ako liwat. Waray ako say pumatay, pinabay'an ko nga say ha iya pumatay an Dios.
—Diri ka natuod han sinisiring nga iginkaigo la?
—An pagtuod han sinisiring nga iginkaigo la amo an pagtuod hin nga milagro; ini nga duha nakakasiring nga an Dios diri maaram han kabubwason. Ano an iginkaigo la? Asya an hinabo nga hinbaliwngan, nga waray gud pagpapamulata. Ano an milagro? Usa nga pagriwa, usa nga pagbungkag han mga kinaiya nga balaod. An paghibalingaw ug paghiriwa han Kinaadman nga asya an nagpapalakat han bug-os nga kalibutan; asya in duha nga dagko nga kasurusnan hadton diri sadang susnan.
—Hino ka? —binmalik pagpakiana hi Ibarra nga may ada gutiay nga kahadlok; —nagtuon ka?
—Naginmatinuuhon ako sa Dios tungod kay nawad'an ako hin pagtoo han mga tawo, —binmaton an paraulin, ilinipas an pakiana.
Hi Ibarra sinmabot hadto nga batan'on nga ginbibiniling han mga punuan: diri natuod han paglaladngan han mga tawo, diri nakilala han katadungan han tawo hin paghukom han iya igkasi, diri hiya uyon nga may mga gamhanan hadton diri sadang susnan.
—Kundi, kinahanglan nga itugot mo nga kasuruk'an an paghukom han igkasitawo bisan pa kun kabtang an paghisayop, —binaton niya. —An Dios, bisan pa kun may
