mga tinubyanan ha tuna, diri makakahimo, karuyag ko sidngon, diri nag-aasoy hin hayag han iya pagburut'an ha pagtuhay han riniburibo nga mga kalipungan nga nahihimo
han aton kamagsinalaypon. Kinahanglan, kasuruk'an, ka-angayan nga an tawo usahay maghukom han iya igkasi.
—Oo, kundi ha maupay, diri ha maraot; ha pag-ayad ug pag-upay, diri ha pagbungkag, kay pananglit kun nagsasayop, diri na naliliwat an maraot nga buhat. Kundi, —nagsiring, iniba an pagpanyakan, — ini nga lantugi hataas na kaupay han akon naaabot ngan ginlilinibang ta ikaw yana nga may nagpapamulat ha imo. Ayaw hingalimot han akon siring may ada ka mga kaaway: Magtipig ka ha imo ngahaw tungod han kaupayan han imo tuna.
Ngan lumusad.
—Sano ta ikaw igkikita liwat? —nagpakiana hi Ibarra.
—Bisan sano nga uras nga imo igkinahanglan ngan akon ipakakaalayon ha imo; may baraluson ko pa ha imo!
Didto han sinabngan nga kiyusko nangangaon an dagko nga mga pagkatawo ha lalawigan.
An Alcalde nalingkod ha usa nga katapusan han lamisa; hi Ibarra ha luyo man nga katapusan. Ha too han ba tan'on nalingkod hi Maria Clara, ngan ha iya wala an Escribano. Hi Kapitan Tiyago, an alperes, an gobernadorsilyo, an mga prayle, an mga empleados ngan han pipira nga kadaragan'an nanlingkod hin pagkasapitsapit nga diri tungod han ira mga katungdanan, kundi tungod han ira hinaayunan.
An pangaon maluya ngan malipayon, kundi ha panungatunga inmabot in usa nga suruguon ha paniligramahan nga namiling kan Kapitan Tiyago paghatag hin usa nga telegrama. Kaiya na gihapon hi Kapitan Tiyago nanarit nga matugutan pagbasa, sugad man kaiya na gihapon nga ngatanan nangaro nga iya basahon.
An takos nga kapitan nagkuriot anay, katima pukraton hin haluag an mga mata, an iya bayhon iginduruas, unina nalipay ngan dinmalidali pagpilo han papel ngan bumuhat:
—Kaginuuhan! —nagsiring, nalilisang, —Hi S. E. an Capitan General maabot niyan nga kulop, pagpapakataku-
