kakayubit, salit hi Ibarra han pakakita ha iya nawad'an
hin pamurubuot.
Sinugat hi P. Damaso hin mga makiaangayon nga mga pulong bisan kun may nanhihipausa, kundi ngatanan nalipay han iya pagdaraon, labot kan Ibarra. Nangangaon na han postre ngan an irinmon nga tsampan nagbubura na dida han mga kopa.
An hiyom ni P. Damaso naginhilaw nga tawa han pakakita kan Maria Clara nga nahatutupad ha too ni Crisostomo; kundi han paglingkod niya dida ha tupad han Alcalde, dida han pagmingaw nga daw surupaton, nagpakiana;
—May ada niyo ginhihiruhimangraw, kaginuuhan? Padayon la kamo!
—Nagbibrindis, binmaton an Alcalde. —hi Sr. Ibarra naghihinabi han ngatanan nga nakabulig ha iya hinin iya maupay nga panalinguha, an arkitekto gud an hinnanabihan han hi V. R.....
—Ako, diri ako maaram hin arkitektura, inmulang hi P. Damaso, —kundi gintitinawaan ko an mga arkitekto ug an mga lurong nga natawag ha ira. lito, ako in nagtukod han plano hito nga singbahan, iito, madig-on nga kahimo: amo an sumat ha akon hin usa nga alahero nga ingles nga sinmaka hadto dida ha kombento. An paghimo hin plano, mamay-ada la duha katudlo kahalapad nga agtang!
—Kundi, —binmaton an Alcalda han pag-abat nga hi Ibarra waray pagyayakan, —kun dagko na nga mga tirindugon, sugad pananglit hini nga liburan, kinahanglan na in usa nga dati...
—Ano nga mga dati! —An badyangas nga siring ni P. Damaso. —An magkinahanglan hin mga dati usa nga waray data! Kinahanglan nga lurong pa han mga indiyo nga naglulugaring panhimo han ira mga payag, ura- ura kalurong nga diri habaro pagtukod hin upat nga puto ngan butangan hin usa nga tapangko,(20) liburan na!
Ngatanan naniplat kan Ibarra, kundi ini, bisan iginduduruas, nagpipinakihimangraw la kan Maria Clara.
—Kundi, mamurubuot hi V.R.....
—Kitaa daw, nagpadayon an pransiskano nga waray pasasagbang han Alcalde, —usa namon nga lego, an uraura ngani kalurong, nagtukod hin usa nga hospital nga ma-
