dig-on, maupay ngan diri mahal. Maupay sumugo ngan tagwalo la nga dako(21) an adlaw an suhol niya han mga tawo nga tikang ha iba nga bungto. Amo adto in maupay magpasugot, diri sugad hinin damo niyan nga mga chiflaos, mga mesticillos, nga amo in nakakadarahig hinin mga tawo nga ginpapahiara hin tagtulo, tag-upat kasikapat..
— Nasiring hi V. R. nga nagbayad han mga tawo hin tagwalo nga dako? Diri mahihimo! talinguha han Alcalde pagbalhin han karukayakan.
— Oo, ngan angay ini pagsubdan han ngatanan nga makakaisip nga totoo nga katsila. Kay tikang la mabuksan an Kanal ha Suez, an magraot nga batasan inmabot nganhi. Hadto anay, han ginlilipot ta pa an Kabo, waray nagpapakanhi nga mga suhot-balagon, ngan waray man liwat nagpapakadto pagtuon hin kawaray himangkaagan!
— Kundi, P. Damaso!. . .
— Nakilala ka na han indiyo: han paghihibaro magpakamakinaadmananon. Ngatanan ito nga mga lusngog nga nagpapakadto ha Europa ....
— Kundi, pamati daw, V. R.! — nag-iimakasasagbang an Alcalde nga nababaraka na han kamasakit pamation hadto nga mga pulong.
— Ngatanan amo ito an dadangatan, — nagpadayon; —an kamot sa Dios aada inaabat, buta la an diri kumita. Buhi pa, daan na pinapapanhimaul-ol an mga kag-anak hito nga mga sapat... nagkakamamatay ha bilangguan, he! he! sugad hiton waray sadang . . .(2)
Kundi waray pakahuman han pulong. Hi Ibarra, ginduduas, nagkikinita ngayan ha iya; han pakabati nga hinnanabihan an iya amay binmuhat ngan ha usa kabiksal suntukon an padi dida ha ulo han iya mabakod nga kamaoo ngan an padi napulilid, nabungog.
An namamagkita pinanngalasan ngan, puno hin kahadlok waray may nagpasipara pagsagang.
— Antaw!— sinminggaak an batan’on hin makalilisang nga tingog ngan puruton in usa nga tais nga sipol hamtang tinatamakan niya an padi ha liog basi diri makakiwa kay hinmamagutaw'an na;—an naawil pa han iya kinabuhi diri dumaop!
Hi Ibarra waray na panginginano: nakujog an iya lawas ngan an iya tuwutawo nagkukunong hiian duro nga
