Nahasamwak dayon dida ha bungto adto nga hinabo. Ha siyahan waray may natuod, kundi tungod kay totoo man nga hinabo waray na iba nga nabubuhat kun diri an paghiruhimangraw hin kabaraka.
Magkalainlain an hiruhimangraw sugad han kanan tagsatagsa pagbati.
— Hi P. Damaso patay! —nasiring an iba; —han pagbuhata luob hin dugo an kahimo ngan waray pakakaginhawa.
— Kaluuyan sa Dios; bayad na gad man adto han mga utangan pulong hin usa nga bagontubo. —Kitaa la, an binuhat kanina didto ha kombento diri sadang ig-asoy.
— Ano in binuhat? Gindabal na man an kuwadhutor?
— Nag-ano? Hala daw, igsumat daw!
— Nakakita kamo kanina han aga hin usa nga mestiso nga ngadto guwa ha sakristiya hamtang nagwawali?.
— Oo! hinkit'an namon; ginkinitaan ni P. Damaso.
— Ada... katima han wali ipatawag ngan pakianhan kay ano nga ginmuwa. "Diri ako nasabot han tinag-alog, padre," binmaton. "Kay ano man in pagbadyangas mo pagsiring nga griyego adto?" ginuliatan ni P. Damaso ngan tampaluhon. An batan'on binmulos, nagsuntukay an duha ngada han pagbulaga han iba.
— Kun ako in ginsugad . . . — nagligot in usa nga magturon
— Diri ako nauyon han binuhatan han pransiskano.—sinmiring in usa, kay an Tuluuhan diri angay igpanlugos sugad hin usa nga kastigo; kundi maupay ngani liwat kay nakilala ako hadto nga ulitawo, maaram ako nga taga S. Pedro Makati ngan maaram magtinag-alog. Yana karuyag nga pakasidngon nga pag-aabot pa la tikang ha Rusia ngan iginagasad an kadiri maaram han yinaknan han iya mga kag-anak.
— Kun amo, nagkita an magkasi kutuon!(1)
— Bisan la, diri ta angay uyunan an sugad hito nga buhat, — nagyakan in usa liwat nga magturuon; —diri angay pagpabay'an la, kay kun umukoy la kita, ito nga kasugad bangin mahinabo hin usa liwat ha aton. Mabalik kita ha mga panahon ni Neron!(²)
