mangrawan hin pipira ha ira, didto tampo in usa ta nga kilala nga amo an tawo nga naghihiningyapon hin doktor nga mananambal.
—An nabibiduan ko la, — nasiring, —tungod kay an liburan diri mahuhuman!
—Kay ano, kay ano?— nanhinpakiana han mga kahimangraw.
—Iton akon bata diri na makakagdoktor, kundi magkakarromatero na la! Waray! Hain pa in liburan!
—Hino in nasiring nga mawawaray na liburan?— nagpakiana in usa nga iraya nga buksol, haglapad an apapangig ngan gutiay an ulo..
—Hi ako! Hi D. Crisostomo ginngangaranan nga plibastiero (6) han mga busag nga padi. Waray na liburan!
Ngatanan nanhipanganga. Amo pa adto hibatian nira nga ngaran,
—Kay maraot ito nga ngaran? nagpasipara pagpakiana an iraya.
—Asya an gimarauti nga maluluwas hin usa nga binunyagan ha iya igkasi!
—Labi pa kamaraot han tarantado ngan han saragate?(7)
—Kun amo la ito diri maano! Nakadamo na ako hito pagngarani waray pa ako pagsakiti hin tiyan !
—Sabuot ko diri malabaw han indiyo nga luluwason han alperes!
An namamay-anak nga karretero nahapapahiyom; an iya kahimangraw nagkikinalot han ulo ngan namumurubuot.
—Kun diri man, bangin sugad han betelapora(8) nga yayangbaton hiton lagas nga ginang hiton alperes? Kay an malabaw hito an pagtupra na la han ostiyas.
—Ta, masayod ka: labaw pa han pagtupra han ostiyas kun Viernes Santo, binmaton hin waray tawatawa. —Hanunumdom ka na han pulong nga espichoso(9) nga kun say iginngangaran hin usa katawo, ini nga tawo gindadara dayon han mga sibil ni Villa-Abrille(10) ngadto ha kahalin, kun diri man ngadto ha bilangguan, ta an plebestiero uraura pa hito. Nasiring iton telegrapista ngan iton direktorsilyo nga an plibestiro kun luwason hin usa nga binunyagan ha usa nga padi o usa nga katsila ha usa liwat nga binunyagan sugad ha aton, masugadsugad han santusdeus
