ngan rekimiternam: kun mga sano ngaranan ka nga plibustiero pagkumpisal na la ngadaan ngan pamayad hiton imo mga utang kay waray mo na mahihimo kun diri pagpahikog na la. Maaram ka na kun nagbubuwa ba iton direktorsilyo ngan hiton telegrapista: iton usa ha ira nagyayakan ha mga kawad ngan iton usa man maaram magkinatsila ngan wa- ray kinaptan nga iba kun diri dagang la.
Ngatanan nagkahahadlok.
—Bisan pa daw ako pagpiriton pagsapin ngan diri ako painmon ha bug-os ko nga kinabuhi kundi iton ihi la hin kabayo nga sinisiring nga serbesa, kun mapapagngaran ba ako hin pelbistero. —Nangumol han kamaoo an iraya. — Hino in magpapasipara? Kun ako in salapian sugad kan D. Crisostomo, maaram magkinatsila ngan madagmit kumaon hin may sipol ngan may kutsara, pagtitinawaan ko la in lima nga kapadian!
—An siyahan nga sibil nga hikit'an ko nga mangangawat hin manok pagngangaranan ko hin palabistiero . . . ngan ikukumpisal ko dayon! ―nangurutob in usa umanhon nga nagtitiharayo dida han hurungko.
Ha balay ni Kapitan Tiyago an naguop nga kasamok diri kay guruguti han nakadto ha panhunahuna han mga tawo. Hi Maria Clara waray na nabubuhat kun diri pagtinuok ngan diri na namamati han mga pagliaw ha iya nga mga pulong ni iya dada ngan ni Andeng, an iya bugto ha gatas. Gindid'an hiya ni iya itay pakighimangraw kan Ibarra hamtang diri pa pasasayluon han kapadian ngan diri gawson ha eskomunyon.
Hi Kapitan Tiyago nga nalilibang hin pag-inandam han iya balay bahin ha pagkarawat han Capitan General, ipinatawag ngadto ha kombento.
—Ayaw pagtinangis, inday, ―nasiring hi Dada Isabel nga naghihinis han gamusa dida han mainggat nga salaming nga panganinawan; babawion ito nira ha eskomunyon, mananagsurat ito ha Santo Papa . . . malimos kita hin dako... hi P. Damaso naunop gad la... waray kamatay!
—Ayaw pagtinuok,— hinuringan ni Andeng; —tatalinguhaon ko nga igkahimangraw ka; ano man la in gamit
