hinin imo anak? Diri mo sangkay iton arsobispo? Kay ano nga diri mo ginsusuratan?
—Iton arsobispo prayle liwat, salit waray hito lain nga mabubuhat kun diri an pag-uyon han yaknon han mga prayle. Kundi, Maria, ayaw pagtinuok; maabot an Capitan General, makakakita ha imo nga mapulapula iton imo mga mata. . . Hay! ako nga naglalaom hin malipayon nga kakurulpon... kun diri la ini nga dako nga kabiduan ako unta in labi kamalipayon nga tawo ngan igkakaawa han ngatanan... Ukoy na, iday; darudako iton akon kabiduan hiton imo, kundi diri ako nagtutuok! Igkikita ka pa hin mauruupay nga tawo, kundi ako makakaragan yana hin kakalim'an kayukot kapisos! Ay, Virgen ha Antipolo, mamay-palad ko unta niyan nga gab-i!
Mga binutubuto, mga kinaradol han mga sarakyan, binarahunog hin kakabayuhan, an banda nga nagtutuktok han Marcha Real, asya an nagpapasabot han pag-abot ni S. E. an Gobernador General ha Kapurupud'an han Pilipinas. Hi Maria Clara dinmalagan ngadto pagtago didto han iya sulod... Kairo man hadto nga daraga! say nag-uuyag han imo kasingkasing in mga garanggasang nga kamot nga diri nasabot han iya kamahumok.
Hamtang napupuno an ira balay hin tawo, naluluob hin mga binadukbadok, mga tingog han pagsugo, harantiyaw han mga sable ug mga itirikod han pangabayo, an nasasakit nga daraga nahapapaluhod ha tungod hin usa nga estampa han Virgen, nga iginpahamutang hin sugad hadto kamasurub'on nga pag-usaan sugad han kan Delaroche(1) pagbati nga baga an pagbalik pa tikang didto ihan linubngan han iya Anak. Hi Maria Clara waray pagdudumdom han kasakit hadto nga iroy, kundi an iya lugaringon la nga kasakit. An iya kabutang, nga idinuduko an ulo, idinuduon an mga kamot ha salog, daw an lawas hin usa nga asusena nga pinilo han makusog nga hangin. Karuyag nga ha usa la kapulong paraon ha iya hunahuna ug kasingkasing in usa nga paghingyap ug paglaom nga gintipigan hin kapid'an katuig, in usa nga inop nga dara han pagkabata ngan bunyog han pagkadaraga ngan iya na naginkinabuhi! Daw sugad hin pagkuha han putok han iya kasingkasing ngan pagparong han silaw ha iya panumduman!
Hi Maria Clara maupay ngan matinumanon nga binunyagan kundi mahigugmaon nga anak. Diri an eskomunyon an say niya labi nga nahahadlukan kundi an sugo
