nanhipahungat tungod hini nga mga pulong.
—Magkalingkod hira VV. RR.! — nagsiring kahagos hin usa kadali, hinuruhumok an tingog.
Hi Kapitan Tiyago linmagos, naprak ngan naikid paglakat; nagtutugway kan Maria Clara nga nahakakaawod pagguwa. Kundi, bisan la, naghatag gihapon hin angay nga katalahuran,
—Imo anak ini nga senyorita?— nagpakiana an Capitan General dara han paghipausa.
—Ngan imo man liwat, General!(2)—binmaton hin ungud-ungod hi Kapitan Tiyago.
An Alcalde ngan han mga ayudantes nanmukrat han ira mga mata, kundi an nawong ni S. E. waray kabantad; idinuhol ha daraga an iya kamot ngan mamulong hin maambong nga tingog:
—Maghimayaon an mga kag-anak han sugad ha imo nga anak, senyorita! Hinnabihan ka ha akon hin lunlon la katahod ug pagdayaw... nagtalinguha ako hin pag-ikinikitaan ha imo tuyo ko in pagpasalamat ha imo han makaruruyag nga imo nabuhat hini nga bug-os nga adlaw. Sayod ako han ngatanan nga nahinabo ngan magsurat ngani ako ngadto ha Gobyerno ni S. M. diri ko hingangalimtan an maupay nga imo nabuhat. Kundi, siyahan, tuguti ako, senyorita, nga ha ngaran ni S. M. an Hadi, nga akon dinhi pinanlalawas, nga mahiningyapon han kahimyangan ug pagkadait han iya magtinumanon nga mga alagad, ngan ha akon man kalugaringon nga ngaran, an kanan hin usa nga amay nga may ada man mga anak nga babayi nga sugad ha imo in panuigon, nga makaghatag ako hin damo nga mga pasalamat ngan makapangaro ako nga mahatagan ka hin usa nga pahalipay!
—Senyor...!—binmaton, nakurog, hi Maria Clara.
Natigo ni S. E. an karuyag sidngon, salit namulong:
—Maupay gad man gud, senyorita, nga igmaigo mo na la an kalipay mo ha kasingkasing ngan an mga pagdayaw ha imo han imo mga igkasi bungtuhanon: natuod ako nga asya an gimaupayi nga pahalipay, ngan kita an tawo diri na angay mag-ungara hin iba pa, kundi ayaw man ako pag pugngi nga magpahimulos hini nga malipayon nga higayon ha pagpakita nga kun an Pagkamatadong maaram magpahamaan han nakakasala, maaram man liwat maghatag hin himudlay ngan diri unob la nga buta.
