in nakapugong nga hira magkahimangraw hin bisan la ano.
Dida ha purtahan iginhisugat kan Maria Clara; an ira magkasi siplat suluran man liwat hin damo nga kahulugan, kundi lain han kahulugan han siplat han mga prayle.
Hi Ibarra lubos nga luto an sul-ot. Inmatubang hin huyayag nga pamahungpahong ngan naghatag hin katalahuran, bisan kun maraot in dara ha iya panhunahuna han panungbalay han mga prayle.
Sinugat hiya hin pira kapitad han Capitan General.
—Dako ko nga kalipay inin pakiglamano ha imo, Sr. Ibarra. Tuguti ako nga pakiatubangan ta ikaw sugad hin hinasa nga sangkay.
Matuod man gud ginkinita ngan gintinutok ni S. E. an batan'on dara in dako nga kalipay.
—Senyor. . . inin imo pakiangay . . . !
—Inin imo paghipausa nakakabido ha akon, kay daw karuyag sidngon nga diri ka ha akon nagpapamulat hin maupay nga kaburut'on; usa ini nga pagruhaduha han akon kamakimatadong!
—Usa nga makisasangkayon nga pakiatubang nga isugat ha usa nga ubos nga alagad ni S. E., sugad ha akon, senyor, diri katadungan kundi utang nga buot.
—Maupay, maupay! pulong ni S. E. nga linmingkod ngan tinmudlok kan Ibarra hin usa nga lingkuran, mahuway daw kita makausa hin madaliay; inmayon gud ako kaupay han imo binuhat ngan nagtugon na ako ngadto ha Gobierno ni S. M. nga tagan ka hin makakapadungog ha imo tungod han mainalinsakubon nga panhunahuna pagpatindog hin usa nga liburan... Kun imo ako ginsuratan, natambong gud ako han pagbutang han siyahan nga bato, ngan tingali kun nahanganhi ako waray nahanabo nga maraot.
—Pinakagutiay ko ini nga buhat, binmaton an batan'on, ―nga igsasangpit ha imo nga angay pakalibangan ni V. E. dida han damo mo nga inaatubang; labot pa, katungdanan ko in pagdangop anay han siyahan nga punuan ha lalawigan.
Hi S.E. pinmakiwa han ulo hin kanan paghiayuni ngan magpadayon pamulong hin tingog nga labi pa kamakiaangayon:
—Mahatungod han iyo pagkaaway ngan hi P. Damaso, ayaw la kahadlok ngan ayaw pagdumot: diri sasapingan
