—Hi ikaw an siyahan nga tawo nga iginkahimangraw ko dinhi hini nga tuna!— nagsiring ngan iduhol an iya kamot ngada han batan'on.
—Say la hinkit'an ni V. E. an mga lumalangyaw ha kalarakan tungod kay waray nimo kadtua an mga tinamay nga payag didto ha kaburubungtuhan; hinkikit'an unta ni V. E. an totoo nga mga tawo, kun an pagkatawo dida kikitaa han maupay nga kasingkasing ug yano nga pamatasan.
An Capitan General binmuhat ngan magsuduysudoy dida han ruwang.
—Senyor Ibarra,— nagsiring, iinukoy hin tigda an pagsuduysudoy. An batan'on binmuhat; —tingali ha sakob hin usa kabulan lumakat ako; iton imo hibaro ngan iton imo panhunahuna diri angay dinhi hini nga tuna. Igbaligya an ngatanan mo nga ginawi, andama an imo putos ngan upod ha akon ngadi ha Europa; adto didto nga mga nayon asya an aayunan mo
—An pagkamaupay ni V. E. pagdudumdumon ko hamtang nga buhi pa ako! —binmaton hi Ibarra dapit may pagkaamdok; —kundi kinahanglan nga dinhi ako magukoy han tuna nga gin-ukyan han akon mga kag-anak
—Nga ira kinamatyan, sidnga lugod hin tultol! Tuod la, tingali lupig ta ikaw hin pagkilala han imo ngahaw tuna... Ah! sulibangko pa man, — nagsiring binalhin an tingog, — nangangasawa ka hin usa nga matahom nga daraga ngan iini ginlilinibang ko ikaw! Kadtuna, kadtuna, ngan basi ha imo waray makasagaki pakanhia iton amay, —nagsiring nahapapahiyom. —Kundi ayaw kalimot nga karuyag ko nga updan mo ako unina ha pagpasyada.
Hi Ibarra yinmukbo ngan lumakat.
Hi S. E. tinmawag hin usa nga ayudante.
—Hin-ayunan ako!— ginsiring ngan iya ginpakpak hin hinay ha sugbong; —yana pagsasabot ko pa la nga mahihimo hin pagkamaupay nga espanyol nga diri mabaya han pagkamaupay nga pilipino ngan han paghigugma han lugaringon nga tuna; yana iginpasabot ko han mga reberensiyas nga diri kita ngatanan uyagan nira: ini nga batan'on asya in nakahatag ha akon hin higayon ngan diri maiha magkikirita kami ngan hini nga mga prayles! Kanugon nga ini nga batan'on mga sano nga adlaw... kundi, tawaga an Alcalde!
