—Hino?— pinmakiana hi Maria Clara.
—Hi ako!
Inmukoy an mga tingog ngan an purtahan . . . waray buksi.
—Hi ako gad, makakasulod ako?— nagpakiana an batan’on, nadinagukdok an dughan.
Dinmugang la an kahilom. Ha mga pira kadali nadungog niya in hinay nga pitad nga nagtidaop ha may purtahan ngan an malipayon nga tingog ni Sinang nabati ha may kaluhuan han yawihan:
—Crisostomo, magkikita kami niyan nga gab-i han paguwa; isurat la kun ano imo tuyo kan Maria Clara.
Ngan pumaharayo liwat adto nga pitad, sugad hin kadagmit han pagtidaop.
—Ano in karuyag hini sidngon?— nagpinanmurubuot hi Ibarra nga nagtitiantaw hin hinayhinay tikang dida han sulod.
Han pagkagab-i, han nagkakapaparuktan na an mga parol ha mga tangbuanan, ginmuwa, ha ikaupat nga pagguwa, an prosesyon, dungan han rupiki han mga lingganay ngan han hin-aaraan nga aringasa han mga pabuto.
An Capitan General, nga linmusad, naglakat la, upod han iya mga ayudantes, hi Kapitan Tiyago, an Alcalde, an alperes ngan hi Ibarra, gin-uunhan han mga sibil ngan han mga punuan han bungto nga nagwawahig han mga tawo basi mamay-agian, gin-abiabi pagkita han prosesyon didto ha balay han gobernadorsilyo, nga nagpatindog ha atubangan hin usa nga tarima nga pagluluwasan han luwa(1) nga andam han Santo Patron.
Hi Ibarra apit diri na la anay mamati hadto nga siday nga pagluluwahon kay minamaupay niya an pagkita didto kanda Kapitan Tiyago, kay aadto hira Maria Clara ngan han iya kasangkayan, kundi hi S. E. karuyag mamati han luwa salit nag-ilob na la pagpinanumdom nga unina na la niya igkikita didto ha paguwa.
An prosesyon gin-uunhan han mga siryales nga salapi nga gindadara hin tutulo nga monosilyos nga may mga guwantes; ha luyo nira nasunod an kabataan ha liburan nga
