ngani hin hilom la ngan waray mga dagkot an ira mga parol.
—Waray palad! —nagmugo an pilosopo nga Tasyo nga nagkikinita han prosesyon didto ha tuna; —waray la pulos an imo kamag-uruna han Maupay nga Sumat ngan han pagtungok ni Jesus ha imo atubangan! Waray la pulos an imo dako nga pagtoo ug mga pag-antos; waray la pulos an imo kamatay tungod han kamatuuran ngan tungod han tinatangduan han imo kasingkasing: ito ngatanan hinngangalimtan han mga tawo ngan waray iba nga ibinabantog kun diri an lugaringon la nga kalalaki! Gabay magwali, bisan diri tuhay, ha sakob han mga singbahan kay mauruupay pa han pamulong hin tukib ha butnga han kamingawan; ini sadang mo pagtigamnan dinhi ha Pilipinas. Kun say mo kinaon in mga pabo, sugad ha amon, diri duron; kun say mo iginpanapton in mga seda, diri anit; kun tinmampo ka hin usa hinin amon mga Orden hin kapadian . . .
Kundi waray igpadayon han lagas an iya pagmugo kay nagtitidaraon hi San Francisco.
—Nasiring pa ako!- nagpadayon, nahakakatawa; —kinarro ngahaw ini, ngan pastilan nga karro! Waray gud ako panabali, Giovanni Bernardoni,(2) nga paglilibutan ka hin sugad kadamo nga mga suga! Ngan agi inin musika! Lain la nga musika an gintutuktok han imo mga sumusunod hadto han imo kamatay! Kundi, harangdon nga magturukod, kun mabanhaw ka yana waray mo igkikita kundi mga layaw la nga Elias ha Cortona, ngan kun hikilal'an ka pa han imo mga anak, bibilangguon ka ngan bangin ngani mahanabo ha imo an sugad han nahinabo kan Cesareo de Speyer!
Ha luyo han musika may nasunod nga estandarte nga nalaladawanan han mao ngahaw nga santo, kundi may pako nga pipito; ini nga estandarte gindadara han mga Hermanos Terceros nga nagpapaka-sukrob hin sapot nga ginggon ngan namamagpinangadi, dagko an tingog ngan magpakaluluoy. Hin waray sabuta kun ano, nahasusunod hadto nga santo hi Sta. Maria Magdalena, gimahusayi nga ladawan nga marabong an buhok, may panyo nga pinya nga binurdahan, dida han iya mga tudlo nga puno hin singsing, ngan an iya sul-ot panapton nga seda nga rinayandayanan hin mga lapak nga bulawan. Ginlilibot hiya hin mga suga ngan hin aso hin insenso; an iya mga luha nga
