nga mga katingalahan, labot pa, an pransiskano mabibido
ha amon kun amon padangan hin usa nga makikigtigi ha
iya, ngan diri kami hini karuyag kay, kaluoy sa Dios, diri
kami magpakiaawayon nga mga tawo.
Katapos han luwa magpadayon an prosesyon: hi San Juan nagpadayon pagsulsog han iya dalan ha kapaitan.
Han paghitungod han Virgen dida ha balay ni Kapitan Tiyago sugaton hin langitnon nga awit nga an mga pulong daw kanan manulunda. Asya in usa nga tingog nga huboy, malanoy, mahinangyuon, nga daw nagngu-nguyngoy han Ave Maria ni Gounod, nga dinuduyugan han piyano, nga sugad man baga nangangamuyo. Inmukoy an musika nga bunyog han prosesyon, hinmunong an mga pangadi ngan hi P. Salvi ngahaw inmukoy. An tingog nakakapamantad ngan nakakapatangis: lupig pa in usa nga saurog, usa nga panginyupo, usa nga mapait nga sumbong.
Hi Ibarra nakabati han tingog tikang didto han tangbuanan nga iya hinmumutangan ngan an kabaraka ug kasamdong ginmuop ha iya kasingkasing. Sinmabot hiya han kasakit nga gindadara hadto nga kalag, kasakit nga igin-aasoy dida han ambahan, ngan waray hiya gahom hin pagtugkad hadto nga kasakit.
Masulub'on ngan mahinuklugon an iya dagway nga atubangon hiya han Capitan General:
—Tupdi ako ha panangka; karuyag ko ha imo makig-himangraw mahatungod hiton duduha nga bata nga nawawara, nagsiring ha iya.
—Hi ako ada in tinikangan?-nakaisip an batan'on, nagsisiniplaton kan S. E. hin waray niya kikitaa ug say niya ginsisinunod hin waray la hiya sasabot.
Kay ano nga tinakpan an mga tangbuanan han balay han alperes? Nakain man, hamtang naagi an prosesyon, an palakin'on ngan an pranela nga bado han Medusa o bado han Musa han Guardia Civil? Sinmabot ada hi Da. Consolacion nga malaw-ay pagkit'on an iya agtang nga ginbabalakbalakan hin dagko nga ugat nga daw an inaagian, diri hin dugo, kundi hin suoy ngan hin apdo, an iya bahol nga inunay, sabong nga angay han im-im nga nangangapay,
