kit'on ngan mauruupay ug marumahal pa mamanapton kan
Maria Clara kay ini natapis, kundi hiya diri. Nagkakasuruk'an nga sidngon hiya han alperes: "Ukoy, kun diri pagpapamamanyakan ta ikaw tipakadto hiton imo binanyaga nga bungto!"
Hi Da. Consolacion diri buot nga pagsundon hin banyak ngadto ha iya bungto, kundi naghunahuna hin pagibinubulusan.
Waray gud an dagway nga arimungot han ginang, kakano pa man, makahatag hin gutiay nga tigaman nga sadang lauman hin bisan hino, bisan kun hiya nagmimisla han iya bayhon, kundi hadto nga aga nakalisang gud hiya kaupay labi na han paghikit'i nga nagbibinalikbalik, patapustapos han ruwang, waray yakanyakan, sugad hin mayusa niya nga bubuhaton nga makaharadlok ug makalilisang; an iya paniplat may dara nga inggat nga masugadsugad hiton nakikita dida ha mata hin usa nga halas kun nahadadakop ug gin-iitaramakan: asya in usa nga paniplat nga mahagkot, nagdidingga, matarom ngan dapit malubog, makangingirhat ngan mapintas.
An labi kagutiay nga paghilisa, an gigagamayi nga ka- rasikas nakakaaghat ha iya hin waray haros nga panampalas nga nakakasakit han kalag; kundi waray ha iya nabaton; an pamaribad labi na hin kadako nga sayop.
Asya ini an nasugaran han bug-os nga adlaw. Kay waray man ha iya nakakasuklat ha mata —an iya bana nakadto ha panagtawo —nadugang pagsukob an iya kasinahon; haros pakasidngon nga an iya bug-os nga kalawasan napupuno hin kangaralson nga, maiha, magdali, magbubuto. Ngatanan ha iya atubangan nalubay, sugad han mga uhay kun ipinupuros han bagyo; waray iginkakabangga, waray iginkikita nga katadman nga sadang papudkan han iya kasinahon: an mga sundalo ug mga suruguon nanhahapa dida ha iya atubangan.
Basi niya diri hibatian an kalipayan ha gawas, iya pinapanadhan an mga hangawan, nagtugon han bantay ha purtahan nga waray paagion nga bisan hino. Nagbutok hin panyo ha ulo, daw paghirot nga diri magbuto, ngan, bisan hataas pa an adlaw, napapagdagkot hin suga.
Hi Sisa, sugad han aton na hinkit'an, gindakop hadto nga adlaw tungod hin pakaaringasa ngan gindara ngadto ha bilangguan. An alperes waray hadto didto ngan an waray
