palad nga babayi nag-aga la hin pagliningkod ha usa nga
bangko, an paniplat waray hinmumutangan. Han pagka-aga hinkit'an han alperes ngan, tungod han iya kahadlok
nga pagdarahugan hadto nga adlaw nga nagkakadamudamo, igintugon han mga sundalo nga bantayan, diri paghukaan ngan tagan hin pagkaon. Dinuhaan kaadlaw didto an tuyaw.
Hini nga gab-i, tungod ada kay haraniay an balay ni Kapitan Tiyago, pinmaabot ngadto ha iya an tingog ni Maria Clara han pagkanta, kun bangin man liwat may iba mga tunog nga nakasangpit ha iya han iya una nga mga karantahon, kun tingali man bisan la ano nga hinungdan, hi Sisa sinmubad pagkanta hin matam-is ug makaluluoy nga tingog han mga kundiman niya han hiya batan'on pa. An mga sundalo nagpakabati ngan waray pamagaringasa: hay! adto nga mga ambahanon nakakapukaw hin mag-iha na nga mga hinumduman hadton panahon han waray pa hira panhihidarahigi hin maraot.
Hi Da. Consolacion nga nauuyam, nakabati man liwat ngan han kasayod la kun hino an nagkakanta.
—Sumaka dayon! —nagsugo, kahagos hin pira kadali nga painuino. Usa nga ngisi, ambot kun hiyom, inaabat dida han iya apay nga mga im-im.
Isinaka hi Sisa ngan inmatubang hin waray la kaalantad ug waray kahadlok, bisan paghitingala: sugad hiton waray niya hinkikit'an nga ginang. Asya ini an nangalsan han Musa, kay karuyag niya nga kahadlukan hiya ug pagtahuron.
An alperesa inmigham, kininhatan an mga sundalo nga magkalusad ngan paluson an latigo han iya bana, magsiring han tuyaw, may lain nga tunog han tingog:
—Bamos, magkantar ikaw!(4)
Hi Sisa, kaiya, waray sabot, salit dinmugang an pangisugon han usa.
Usa han mga kaupayan hini nga ginang asya an diri pagpakamaaram magtinag-alog, gintutuyo niya in pagtinagalog nga diri asya basi pakasidngon nga totoo nga orofea(5), siring pa hin iya. Ngan maupay na la! kay kun an tinagalog iya gintatadtad, an kinatsila labi na, diri gramatika la, kundi pati an pagluwas. Ito ngani nga ngatanan na nanngamot hin pagtutdo ha iya, sugad han nahihimo han tagsatagsa: an iya bana, an mga lingkuran ngan an mga sapa-
